काठमाडौं । टाइब्रेकरमा साविक विजेता भारतलाई ४–३ ले हराउँदै बंगलादेश साफ यू–२० च्याम्पियनसिपको फाइनलमा प्रवेश गरेको छ ।

सोमबार सातदोबाटोस्थित एन्फा मुख्यालयमा सम्पन्न फाइनलमा खेलको निर्धारित समय १–१ को बराबरीमा समाप्त भएपछि पेनाल्टी सुटआउटबाट नतिजाको निर्णय भएको हो ।

पेनाल्टीमा बंगलादेशका गोलकिपर नायक बने । उनले भारतको पहिलो र पाँचौँ प्रहार विफल बनाउँदै बंगलादेशको फाइनल यात्रा पक्का गरे । बंगलादेशबाट पेनाल्टी प्रहारमा आएका चारैजनाले बललाई जाली चुमाए ।

त्यसअघि खेलको पहिलो हाफमा बंगलादेशले अग्रता बनाए पनि त्यसलाई अन्त्यसम्म कायम राख्न सकेन । ३५औँ मिनेटमा असादुल मोल्लाले गोल गर्दै बंगलादेशलाई अग्रतामा राखेका थिए ।

तर, ७५औँ मिनेटमा ग्वग्वम्सार गोयारीले गोल गर्दै भारतीय टिमलाई खेलमा फर्काएका थिए । त्यसपछि दुवै टिमबाट थप गोल नहुँदा खेल पेनाल्टी सुटआउटमा धकेलिएको हो ।

जितसँगै फाइनलमा स्थान बनाएको बंगलादेशले अब उपाधिका निम्ति घरेलु टिम नेपालविरुद्ध खेल्नेछ । यसअघि पहिलो सेमिफाइनलमा भुटानविरुद्ध पेनाल्टी सुटआउटमै जित निकालेपछि नेपालले फाइनल यात्रा तय गरेको थियो ।

फाइनल खेल पनि सातदोबाटोस्थित एन्फा मुख्यालयमै बुधबार हुनेछ ।