सुर्खेत । हुम्लाको चंखेलीमा बुधबार (हिजो) जीप दुर्घटनामा परी गम्भीर घाइते भएका रमेश मल्लको उपचारका क्रममा मृत्यु भएको छ । मुगुको छायानाथरारा नगरपालिका–१३ निवासी २५ वर्षीय मल्लको उपचारका क्रममा सुर्खेतस्थित कर्णाली प्रदेश अस्पतालमा गए राति मृत्यु भएको अस्पतालका सूचना अधिकारी विनोद बस्नेतले जानकारी दिए ।

बुधबार बिहान चंखेली गाउँपालिका–२, गर्खाबाट देउली बजारतर्फ गइरहेको कर्णाली प्रदेश २००१ च ०९२२ नम्बरको जीप मुगुखण्डको गौरीसल्लामा दुर्घटना भएको थियो । उक्त जीपधनी मल्ल आफैँ थिए ।

मल्लका दाइ नाता पर्ने रोशन शाहीले भने, “रमेशले जीप किनेको चार/पाँच महिना मात्रै भयो । सानै उमेरमा बुबा गुमाएका रमेशले घरपरिवार पाल्नका लागि भर्खरै जीप किनेका थिए । रमेशका आमा, श्रीमती र दुई छोराछोरी छन् । उहाँ घरको एक्लो छोरा हुनुहुन्थ्यो ।”

दुर्घटनामा गम्भीर घाइते भएका अरू तीनजनालाई थप उपचारका निम्ति सिम्रिक एयरको हेलिकोप्टरमार्फत उद्धार गरेर प्रदेश अस्पतालमा ल्याइएको थियो । जिल्ला प्रहरी कार्यालय हुम्लाका अनुसार, दुर्घटनामा गम्भीर घाइते भएकामा चंखेली गाउँपालिकाका ३५ वर्षीय सुरेन्द्र शाही, ५० वर्षीय तिलबहादुर शाही र मुगुको छायानाथरारा नगरपालिका–१३ का ४० वर्षीय पृथ्वी रावतलाई सघन उपचार कक्षमा राखी उपचार भइरहेको छ ।

प्रहरीका अनुसार, अरू घाइतेको अवस्था सामान्य रहेकाले चंखेली गाउँपालिकास्थित दार्मा स्वास्थ्य चौकीमा उपचार भइरहेको छ । रासस