म्याग्दी । अविरल वर्षसँगै पहिरो खस्दा बेनी–दरबाङ सडक अवरुद्ध भएको छ । म्याग्दीको बेनी नगरपालिका–४ र मंगला गाउँपालिका–२ को सिमाना फापरखेतमा पहिरो खस्दा उक्त सडकखण्ड अवरुद्ध भएको हो ।

पश्चिम म्याग्दीको ‘लाइफलाइन’का रूपमा लिने गरिएको उक्त सडकको फापरखेतमा सामान्य वर्षा हुँदा पनि बाटो अवरुद्ध हुने गर्छ । यसबाट पश्चिम म्याग्दीका बासिन्दाले सास्ती खेप्दै आएका छन् ।

हाल वर्षा भइरहेको र पहिरो खसिरहेकाले त्यसलाई पन्छाएर यातायात सञ्चालन गर्न नसकिएको सिंगा तातोपानीका व्यवसायी कुमार केसीले जानकारी दिए ।

सडक अवरुद्ध भएपछि यात्रु र सिमलचौर, सिमलगायत ठाउँबाट तातोपानी अध्ययनका निम्ति आउने विद्यार्थीलाई समस्या भएको छ । धवलागिरि, मालिका र मंगला गाउँपालिकालाई जिल्ला सदरमुकाम बेनी बजारसँग जोड्ने उक्त सडक बर्खायाममा झनै जोखिमपूर्ण बन्दै गएको मालिका–६ का वडाध्यक्ष पथबहादुर रोकाले बताए ।

“बेनी–दरबाङ सडक पाखो र भीरको बीचमा खनिएको छ । सडकमुनि म्याग्दी नदी छ । सडकमाथिको भीरमा गेगरैगेगर छ । खोल्सामा पर्ने सडकमाथितर्फ पर्खाल बनाएर पहिरो रोक्ने प्रयास सफल भएको छैन,” वडाध्यक्ष रोकाले भने, “म्याग्दी नदी किनारमा बनाइएका पक्की पर्खालले कटान रोकिएको छ ।”

उनका अनुसार, सडकबाट करिब २०० मिटरमाथि र १५० मिटर फराकिलो क्षेत्रमा पहिरो फैलिएको छ ।

डेढ दशकदेखि करोडौँ खर्चिएर स्तरोन्नति तथा हरेक बर्खाको समयमा दर्जनौँपटक मर्मत गरिए पनि उक्त सडकखण्डको फापरखेतको पहिरो झन्झन् समस्या बन्दै गएको छ । बेनी–४ र मंगला–२ को सिमानाको पहिरो झनै फराकिलो बन्दै जाँदा वर्षा नहुँदा समेत जोखिम बढेपछि आवतजावतमा समस्या भएको छ । रासस