काठमाडौं । काभा महिला भलिबल नेसन्स लिगमा इरानले पहिलो जित निकालेको छ । इरानले शुक्रबारको पहिलो खेलमा श्रीलंकाविरुद्ध ३–२ को रोमाञ्चक सेटमा जित निकालेको हो ।

त्रिपुरेश्वरस्थित राष्ट्रिय खेलकुद परिषद् (राखेप) परिसरमा भएको खेलको पहिलो र दोस्रो सेट इरानले २५–२०, २५–१२ ले जितेको थियो । तर, यसपछिका लगातार दुई सेट श्रीलंकाले जितेपछि खेल पाँचौँ सेटसम्म धकेलिएको हो । तेस्रो र चौथो सेट श्रीलंकाले २५–२२, २५–१३ ले जितेको थियो । तर, अन्तिम सेटमा भने इरानले स्कोर आफ्नो पक्षमा राख्यो ।

अन्तिम सेट १५–११ ले जित्दै इरानले श्रीलंकाको पुनरागमन प्रयास विफल बनाएको हो ।

प्रतियोगितामा इरानको यो पहिलो जित हो । इरान यसअघि पहिलो खेलमा भारतसँग ३–१ को सेटमा पराजित भएको थियो । यस्तै, श्रीलंकाको भने यो प्रतियोगितामा लगातार दोस्रो हार हो । श्रीलंका यसअघि पहिलो खेलमा घरेलु टिम नेपालसँग ३–० को सोझो सेटमा पराजित भएको थियो ।

साउन २३ गतेसम्म सञ्चानल हुने प्रतियोगितामा नेपाल, भारत, इरान, श्रीलंका र माल्दिभ्सगरि कुल पाँच टिमको सहभागिता छ ।