न्युयोर्क  । अमेरिकाका दुई एयरलाइन्सले सुरक्षाको कारण देखाउँदै इजरायल जाने उडान रद्द गरेका छन् । डेल्टा र युनाइटेड एयरलाइन्सले आफ्नो उडान रद्द गरेका हुन् ।

मध्यपूर्वमा तनाव बढ्दै गइरहेकोले बुधबारदेखि लागु हुने गरी उडान रद्द गरिएको युनाइटेड एयरलाइन्सले जनाएको छ । सो कम्पनीले बुधबार नेवार्कबाट तेल अभिभ जाने उडान रद्द गरेको थियो । 

सो कम्पनीले त्यहाँको अवस्था अनुगमन गरिरहेको र त्यसबारेमा थप निर्णय पछि लिइने जनाएको छ । डेल्टा एयरलाइन्सले पनि न्युयोर्कको जेएफकेबाट तेल अभिभको उडान अगस्ट २ सम्मका लागि स्थगन गरेको जनाएको छ ।

सो कम्पनीले पनि कारण सुरक्षाको नै जनाएको छ । बुधबार इजरायलले हमासका नेताको इरानमा र हिजबुल्लाहका कमान्डरको लेबनानमा हत्या गरेपछि मध्यपूर्वमा नै असुरक्षा फैलिने भन्दै चासो उत्पन्न भइरहेको छ । 

अमेरिकाको विदेश मन्त्रालयले आफ्ना नागरिकका लागि ट्राभल एडभाइजरी जारी गरी इजरायल र वेस्ट बैंकको भ्रमण गर्ने कुरामा पुनर्विचार गर्न तथा गाजाको भ्रमण नगर्न आग्रह गरेको छ । यूएसए टुडे