काठमाडौं । अमेरिकी राष्ट्रपति डोनाल्ड ट्रम्पले रूस–युक्रेनबीच बिहीबार टर्कीमा हुने शान्ति वार्तामा सहभागी हुनसक्ने बताएका छन् । अमेरिकाले तीन वर्षे द्वन्द्व अन्त्य गर्न रूस र युक्रेनमाथि दबाब बढाउँदै गरेको बेलामा ट्रम्पले यो सम्भावना व्यक्त गरेका हुन् ।

ट्रम्प यसै हप्ता पश्चिम एसिया (खाडी क्षेत्र)को भ्रमण गर्दै छन् । मंगलवार उनी साउदी अरेबिया आइपुगेका छन् । आफ्नो दोस्रो कार्यकाल सुरु भएपछि पहिलो विदेश यात्राका क्रममा उनले साउदी अरेबिया, संयुक्त अरब इमिरेट्स र कतारको भ्रमण गर्दै छन् । उनले टर्की जाने विकल्पमा पनि विचार गर्नसक्ने बताउँदै भने, “यदि, मलाई यसले मद्दत गर्छ भन्ने लाग्यो भने जानसक्छु ।” 

“मलाई लाग्छ टर्कीमा बिहीबार हुने रूस–युक्रेन वार्ताबाट राम्रो नतिजा आउन सक्छ । म बिहीबार कहाँ हुनेछु थाहा छैन, धेरै बैठकहरू छन्,” सोमबार ह्वाइट हाउसमा पत्रकारहरूसँग कुरा गर्दै ट्रम्पले भने, “तर म त्यहाँ उड्ने विचार गरिरहेको छु । केही हुनसक्छ भन्ने मलाई लाग्यो भने जान्छु ।” 

यसअघि, युक्रेनी राष्ट्रपति भोलोदिमिर जेलेन्स्कीले आफ्नो देशले ट्रम्पको उपस्थितिलाई मूल्यांकन गर्ने बताएका थिए । उनले ट्रम्पले रूसी राष्ट्रपति भ्लादिमिर पुटिनले गरेको प्रत्यक्ष वार्ताको आह्वानलाई समर्थन गरेको घोषणा गरेका थिए ।

जेलेन्स्कीले सम्बोधनमा भने, “राष्ट्रपति ट्रम्पले वार्तालाई पूर्णसमर्थन गर्नु महत्वपूर्ण कदम हो । म उनी टर्कीमा आउन् भन्ने म चाहन्छु ।” 

रूसी राष्ट्रपति पुटिनले टर्कीमा प्रत्यक्ष वार्ताको प्रस्ताव राखेपछि जेलेन्स्कीले आफू पनि वार्ताका लागि तयार भएको बताएका थिए । रुसले सन् २०२२ मा पूर्णरुपमा आक्रमण गरेपछि प्रत्यक्ष वार्ता हुन लागेको यो पहिलोपटक भएको बताइएको छ । सीएनएन