विराटनगर । नेपाली कांग्रेस र नेकपा (एमाले)बीच कोसी प्रदेशमा आलोपालो मुख्यमन्त्री पद लिने सहमति भएको छ । एमाले नेतृत्वको सरकारमा कांग्रेस सहभागी भई आउँदो मंगलबारसम्म मन्त्रिपरिषद् विस्तार गरिने समेत सहमति भएको छ ।

शनिबार काठमाडौंमा मुख्यमन्त्री हिक्मत कार्की, एमाले प्रमुख सचेतक रेवतीरमण भण्डारी, कांग्रेस संसदीय दलका नेता उद्धव थापासहित बसेको नेताहरूको बैठकबाट आलोपालो मुख्यमन्त्री र मन्त्रालयको भागबन्डा मिलाइएको बताइएको छ । कांग्रेस संसदीय दलका उपनेता हिमाल कार्कीका अनुसार, सहमतिबमोजिम केन्द्रमा कांग्रेसतर्फबाट प्रधानमन्त्रीले पदभार सम्हालेलगत्तै कोसीमा मुख्यमन्त्री फेरिनेछ ।

“मन्त्रालय भने चार/चारवटा लाने सहमति भएको छ,” उनले भने, “मुख्यमन्त्रीसहित अहिले एमालेले सम्हालेका मन्त्रालय उहीसँग हुनेछ ।”

कांग्रेसले भौतिक पूर्वाधार, स्वास्थ्य, सामाजिक, पर्यटन वन तथा वातावरण र कृषि तथा सहकारी मन्त्रालय लिनेछ ।

कांग्रेस र एमालेबीच संसदीय समितिका तीन/तीनवटाको सभापति पद लिने भागबन्डा गरिएको छ । सार्वजनिक लेखा समितिको सभापति पद प्रतिपक्षलाई दिने परम्पराअनुरूप नेकपा (माओवादी केन्द्र)ले प्राप्त गर्नेछ ।

एमालेका हिक्मत कार्की माओवादी केन्द्रका सांसदको समर्थनमा नेपालको संविधानको धारा १६८ को उपधारा ५ बमोजिम मुख्यमन्त्री नियुक्त भएका हुन् । केन्द्रमा कांग्रेस–एमाले गठबन्धन भई नयाँ सरकार बनेपछि कोसीमा माओवादीतर्फका मन्त्रीहरूले शुक्रबार राजीनामा दिएका थिए ।