काठमाडौं । एक हप्ताअगाडि गायक शिव परियार र समीक्षा अधिकारीको स्वरमा एउटा गीत रिलिज गरियो । गीतको बोल छ, ‘">धोकेबाज’ । युवराज मगर युट्युब च्यानलबाट रिलिज गरिएको गीतको भिडियो पनि छ ।

पछिल्लो समय बजारमा जस्ता गीत चलिरहेका छन्, त्यसैलाई फलो गरेको देखिएको छ । रवीन लामिछानेको शब्द रहेको गीतमा संगीत युवराज मगरको छ ।

प्रेम र वियोगको सेरोफेरोमा गीत केन्द्रित छ । माया र विश्वास गरेको व्यक्तिबाट नै धोका पाएको सन्दर्भलाई समेटेको गीतका शब्द काव्यिक छैनन् । आमनेपालीले गाली गर्दा प्रयोग गर्ने शब्द ‘साला’ समेत गीतमा छ । यसबाहेक शब्दमा आपत्ति जनाउनुपर्ने ठाउँ छैन ।

सन्दर्भअनुसार हल्का शब्द गीतमा प्रयोग छ । युवालक्षित गीत भएकाले शब्द पनि सोहीअनुसारको छ । यही गीतलाई लिएर यति बेला शिव परियारको आलोचना भइरहेको छ । गीतको भिडियो अपलोड गरिएको युट्युब कमेन्टमै शिवको आलोचना भइरहेको छ । धेरैजसोले शिवको अहिलेसम्मकै ‘झुर’ गीत भनेर कमेन्ट गरेका छन् ।

यस विषयमा शिव भन्छन्, “गाना मैले गाएको हो, भिडियो मैले निर्माण गरेको होइन ।”

आफू गायक मात्र भए पनि भिडियोसँग जोडेर गाली गरिएको उनको गुनासो छ । “भिडियो निर्माणमा मेरो कुनै पनि संलग्नता छैन । तर, गायक मात्र होइन, डिरेक्टर पनि यही हो भनेजसरी कुरा भइरहेको छ,” उनी भन्छन् ।

आफूले अरूको च्यानलका निम्ति पारिश्रमिक लिएर गीत गाएको उनी स्पष्ट पार्छन् । “भिडियोमा तात्तातो कुरा छ भनेर मसँग जोडेर निर्देशक पनि यही हो भन्नेजस्तो भइरहेको छ,” उनी भन्छन्, “गीत मैले गाएको हो, गीतको बारेमा कसैलाई आपत्ति छ भने मैले बोल्नुपर्‍यो । भिडियोको बारेमा आपत्ति हो भने आश्मा विश्वकर्मा र रामजी लामिछानेलाई फोन गर्ने हो ।”

गीत आफूले निर्माण पनि नगरेको र अरूकै च्यानलबाट ल्याइएको उनको भनाइ छ । “गीतमा कोही व्यक्तिलाई लाञ्छना लगाउने शब्द प्रयोग भएको छैन । मायाप्रेमबाट आक्रान्त भएर जीवन बर्बाद भएर व्यक्त भएको शब्दलाई मैले व्यक्त गरेको हो,” उनी भन्छन्, “तिमीले मलाई सखाप पार्‍यौ भन्नु र साला भन्नु उस्तैउस्तै हो ।”

नेपाली चलचित्रमा आदर्श मानिने नायकहरूले बोल्ने संवाद पनि सबैले सुनिरहेको भन्दै गीतको शब्दमा आपत्ति जनाउनुपर्ने अवस्था नरहेको उनको जिकिर छ ।

“सबैको टार्गेट म भएँ, निर्देशक नै म भएझैँ गरेर सबैले मलाई प्रश्न गरिरहनुभएको छ,” शिव भन्छन्, “म भिडियोको कन्सेप्ट र डिजाइनमा सहभागी भएको भए मैले जवाफ दिनुपर्थ्यो । भिडियो फाइनल मैले हेरेको भए पनि त्यसको जिम्मेवार म हुन्थेँ, तर म यो प्रक्रियामै सामेल छैन ।”

अरूको कामका बारेमा आफूले जवाफ दिन नसक्ने उनी स्पष्ट पार्छन् । “अडियोमा प्रश्न छ भने त्यसको जवाफ मैले दिनुपर्छ, दिन्छु,” भिडियोप्रति सन्तुष्ट हुनुहुन्छ ? भन्ने प्रश्नमा शिव भन्छन्, “भिडियोको मलाई प्रश्न नै नगर्नुस् ।”

भिडियोबारे आफू केही नबोल्ने उनी बताउँछन् । अरूको कन्सेप्ट र काममा आफूले जवाफ दिन नमिल्ने उनी तर्क गर्छन् । भिडियोबारे निर्देशक रामजी लामिछाने र आश्मा विश्वकर्मालाई प्रश्न गर्न उनी सुझाव दिन्छन् ।

निर्देशक रामजी भने आफूले बनाएको भिडियोप्रति सन्तुष्ट रहेको बताउँछन् । हरेक सिर्जनालाई हेर्ने दृष्टिकोण व्यक्तिअनुसार फरकफरक हुने उनको भनाइ छ ।

“ट्राजिडी गीतमा केटाकेटी रुने भिडियो मात्र बन्ने गरेकाले त्यस्तो नबनाएर फरक कन्सेप्टमा काम गरौँ भनेर यो भिडियो बनाएका छौँ,” निर्देशक रामजी भन्छन्, “यो कन्सेप्टलाई कतिले स्वीकार गर्नु भएन होला । एकखालका दर्शकले स्वीकार गरे पनि एकखालका दर्शकले नयाँ कन्सेप्टको भिडियो भनेर मन पराइरहनुभएको पनि छ ।”

कलाकार (आश्मा विश्वकर्मा)लाई ग्लामरस तरिकाले आफूले भिडियोमा प्रस्तुत गरेको उनी बताउँछन् । हरेक व्यक्तिले फरकफरक तरिकाले हेर्ने र बुझ्ने कुरालाई नकार्न नहुनेमा उनी जोड दिन्छन् । “एउटै गीतको भिडियो पाँचजना डिरेक्टरलाई दियो भने फरकफरक पाँचवटा कन्सेप्टमा भिडियो बन्छ,” लामिछाने भन्छन्, “मैले मेरो कन्सेप्टअनुसार काम गरेको हुँ । मलाई आफ्नो काममा चित्त बुझेको छ ।”

शिवले भनेजस्तै रामजी भिडियो बनाउँदा आफूले गायकसँग बसेर कन्सेप्ट डिजाइन नगरेको बताउँछन् । यो आफ्नै कन्सेप्ट भएको उनी सुनाउँछन् । “भिडियोमा शिव दाइलाई टिप्पणी गर्ने ठाउँ छैन, उपयुक्त पनि नहोला, किनभने अडियो मात्रै उहाँको पार्ट हो,” लामिछाने भन्छन्, “फरक काम गरौँ भन्ने सोचले मैले कन्सेप्ट बनाएको हुँ । हलिउड, बलिउडमा त यस्तो भिडियो ब्रेकअपका गीतमा आउँछन्, स्वीकार पनि गरिन्छ । हाम्रोमा केही समय लाग्न सक्छ ।”

आफ्नो कारणले गायकले गाली खाइरहेको भए माफी माग्न तयार रहेको उनी बताउँछन् । “भिडियो मैले बनाएको हो, त्यसैले म जवाफदेही हुन्छु,” उनी अगाडि थप्छन्, “यदि, मेरो कारणले शिव दाइले गाली खाइरहनुभएको छ भने म उहाँसँग सरी भन्छु ।”

कसैलाई पनि विवादमा ल्याउने आफ्नो उद्देश्य नरहेको उनी स्पष्ट पार्छन् । एकजनाले भिडियो निर्देशन गर्ने अर्कोले गाली खानु स्वाभाविक नभएकामा उनी जोड दिन्छन् ।

शिव आफैँमा चलेको गायक भएकाले उनीमाथि प्रश्न उठेको हुन सक्ने उनी बताउँछन् । “बजारमा नोटिस नभएका गायकगायिकाले गाएको भए सायद गायकको टिप्पणी हुने थिएन होला,” उनी भन्छन् ।

सर्जक अथवा गीतकार तथा संगीतकार आफैँले चासो देखाएर छायांकन वा युट्युबमा अपलोडअगाडि भिडियो हेर्न चाहेको खण्डमा बोलाउने र त्यसबाहेकको अवस्थामा नबोलाउने गरेको निर्देशक रामजी बताउँछन् ।

यो गीत (धोकेबाज)को भिडियोमा शिव परियार लिप्सिङ दिइरहेका देखिन्छन् । कोरसहरू उनका पछाडि देखिन्छन् । निर्देशक रामजीले भिडियो छायांकनमा शिव आएर लिप्सिङ दिएको जानकारी दिए । “लिप्सिङका लागि शिव दाइ छायांकनस्थलमा आउनुभएको थियो,” उनले भने, “लिप्सिङ गरेर एक/दुई घण्टाजति बसेर जानुभएको हो ।”

शिव पूरै छायांकनमा भने नबसेको उनी बताउँछन् । उनले भिडियो तयार भइसकेपछि अपलोड हुनुभन्दा अगाडि हेर्छु नभनेको र आफूले पनि त्यसका निम्ति आग्रह नगरेको रामजी स्पष्ट पार्छन् ।

निर्देशक रामजी केही आलोचना र टिप्पणी गरिए पनि फरक कन्सेप्टमा बनाएकाले भिडियो धेरैले रुचाएको जिकिर गर्छन् । “राम्रो भएरै हो, गीत अहिले ट्रेन्डिङमा छ,” उनी भन्छन् ।