काठमाडौं । युरोपेली फुटबल महासंघ (यूईएफए)ले युरो–२०२४ को ‘टिम अफ द टुर्नामेन्ट’ सार्वजनिक गरेको छ । यूईएफएले मंगलबार स्पेनका ६ खेलाडीसहित प्रतियोगिताको उत्कृष्ट सुरुआती–११ सार्वजनिक गरेको हो ।

यो टिममा स्पेनका ६, फ्रान्सबाट दुई, इंग्ल्यान्ड, जर्मनी र स्वीट्जरल्यान्डका समान एक खेलाडी छानिएका छन् । यूईएफएले ४–३–३ को संरचनामा प्रतियोगिताको उत्कृष्ट ११ खेलाडी छनोट गरेको हो ।

टिममा स्पेनका फरवार्ड निको विलियम्स, लामिन यमलसँगै जर्मनीका जमल मुसियाला छन् । मिडफिल्डरमा तीनजना नै स्पेनका छन् । मिडफिल्डरमा फाबियन रुइज, ड्यानी ओल्मो र रोद्री छन् ।

यस्तै, रक्षकमा स्पेनका मार्क कुकुरेया, फ्रान्सका विलियम सलिबा, स्वीट्जरल्यान्डका म्यनुअल अकान्जी र इंग्ल्यान्डका काइ वाल्कर छन् । गोलकिपरमा फ्रान्का माइक माइग्नान छन् ।