काठमाडौं । युरो–२०२४ को फाइनलपछि मुख्य प्रशिक्षक ग्यारेथ साउथगेटले टिम छोड्ने निर्णय गरेपछि इंग्ल्यान्ड अहिले नयाँ प्रशिक्षकको खोजीमा छ । इंग्ल्यान्डलाई १०२ खेलसम्म प्रशिक्षण दिएपछि उनले मंगलबार इंग्लिस टिम छोड्ने निर्णय गरेका थिए । 

साउथगेटको राजीनामा इंग्ल्यान्डले युरो–२०२४ को फाइनलमा स्पेनसँग २–१ को हार बेहोरेपछि आएको हो । उनले आठ वर्षसम्म इंग्ल्यान्डको प्रशिक्षण सम्हालेका थिए ।

इंग्ल्यान्ड अहिले नयाँ प्रशिक्षकको खोजीमा छ । इंग्ल्यान्डको नयाँ प्रशिक्षक बन्न सक्ने नाममा पेप ग्वार्डिओला, लि कार्सली, एडी होवे, योर्गान क्लोप, माउरिसियो पोचेटिन्हो, ग्राहम पोटर र थोमस टचेलजस्ता प्रशिक्षक रहेको बीबीसीले जनाएको छ । यस्तै, चेल्सीका पूर्वप्रशिक्षक फ्रांक लाम्पार्ड, मिड्ल्सबर्गका प्रशिक्षक माइकल क्यारिक, सेल्टिकका प्रशिक्षक ब्रेन्डन रोजर्स र चेल्सीका पूर्वप्रशिक्षक जोजे माउरिन्हो पनि यो सूचीमा रहेको बीबीसीले खुलाएको छ । 

साउथगेट सन् २०१६ मा इंग्ल्यान्डको मुख्य प्रशिक्षकमा नियुक्त भएका थिए । त्यसयता, साउथगेटको प्रशिक्षणमा इंग्ल्यान्डले दुईपटक युरोपियन च्याम्पियनसिपको फाइनलमा स्थान बनाएको थियो । तर, दुवै पटक इंग्ल्यान्ड उपविजेतामै सीमित बनेको हो ।