![कोरियन भाषामा डब गरेर रिलिज हुँदै ‘गोर्खा वारियर’, कतिमा बिक्री भयो ?](https://12khari.top/uploads/posts/gg-1721138664.jpg)
काठमाडौं । नेपाली कथानक चलचित्र ‘गोर्खा वारियर’ कोरियन भाषामा डब भएर कोरियामा रिलिज हुने भएको छ । कोरिया राइट्स कोरियन कम्पनी मुभमेन्ट पिक्चर कर्पले खरिद गरेको हो ।
निर्देशक मिलन चाम्सका अनुसार कर्पले कोरियाका लागि सात वर्षको प्रदर्शन तथा वितरण अधिकार लिएको हो । ‘गोर्खा वारियर’को कोरियन भाषामै डब भइसकेको छ । कर्पले पोस्टर पनि सार्वजनिक गरेको छ ।
निर्देशक चाम्सका अनुसार सिनेमा हलमा रिलिज हुनेछ । हल रिलिजपछि त्यहाँको टेलिभिजन च्यानलहरूमा पनि रिलिज हुनेछ ।
“उनीहरूले अब आफू अनुकूल समयमा रिलिज गर्नेछन्,” मिलनले बाह्रखरीसँग भने, “कोरियामा वार जानराको सिनेमाको डिमान्ड छ । त्यसले पनि हामीलाई सहज भयो ।”
उनले नेपाली भाषाको चलचित्र कोरियन भाषामा डब भए रिलिन हुन लागेको पहिलोपटक भएको दाबी गरे ।
उनका अनुसार कोरियन कम्पनीले ‘गोरखा वारियर’ निर्मातालाई आकर्षक अमाउन्टमा एमजी गरेर परसेन्टेजमा राखेको छ । “हल रिलिजमा ५०/५० प्रतिशत तथा ओटीटी र भिडियो अन डिमान्डमा हामी ६० र उनीहरूलाई ४० प्रतिशतमा बसेका छौँ,” उनले बाह्रखरीसँग भने । एमजी रकम भने उनले खुलाएनन् ।
कोरियन भाषामा डब भएर रिलिज हुन लागेको यो पहिलो नेपाली चलचित्र भएको मिलनको दाबी छ ।
“चलचित्र कुनै भाषा, देश र ठाउँ विशेषका लागि मात्रै हुँदैन । यो सबैका लागि हुन्छ, संसारभरिका लागि हुन्छ,” मिलनले भनेका छन्, “यही नवीन सोचको साथ मैले परिकल्पना गरेको थिएँ गोर्खा वारियर । आज त्यही सपनाको एक अंश पूरा भएको छ । यो चलचित्र कोरियन भाषामा प्रर्दशन हुने खबरले उत्साहित छु ।”
उनले यो उपलब्धी नेपाली चलचित्र क्षेत्रका लागि एक ऐतिहासिक दिन हुने बताएका छन् ।
वार जानरामा निर्माण भएको यो चलचित्र नेपालमा गत वर्ष फागुन ११ मा प्रदर्शन भएको थियो ।
यो चलचित्र नेपाली, हिन्दी र कोरियानबाहेक अन्य भाषाको राइट्स अमेरिकन एक कम्पनीले खरिद गरिसकेको छ । मिलनका अनुसार सेल्स एजेन्टले खरिद गरेको हो ।
मलाया जंगलमा बेलायती सेनामा आबद्ध गोर्खा सैनिकले सन् १९४९ मा लडेको लडाइँको कथा यो चलचित्रको मुख्य विषय हो । चलचित्रमा रितेश चाम्स, रेवीका गुरुङ, विजय लामा, रियर राई, शिशिर बाङ्देल, कविता आलेलगायत कलाकार मुख्य भूमिकामा छन् ।
लन्डन सिनेआई प्रोडक्सनको प्रस्तुति र चाम्स इन्टरटेनमेन्टको सहकार्यमा ‘गोर्खा वारियर’ निर्माण भएको चलचित्र हो ।