काठमाडौं । नेकपा (एकीकृत समाजवादी)को असार १६ गतेदेखि हुने महाधिवेशनबाट सर्वसम्मत रूपमा नेतृत्व चयन गर्न प्रदेश कमिटीका अध्यक्षहरू एकमत भएका छन् ।  

शुक्रबार सात प्रदेश र उपत्यका कमिटी अध्यक्षले विज्ञप्ति जारी गर्दै नेतृत्व सर्वसम्मत चयन गर्न विश्वस्त रहेको जनाएको छ । विज्ञप्तिमा भनिएको छ, “एमालेसँग विद्रोह गरेर गठन भएको करिब ३४ महिनापश्चात राष्ट्रिय महाधिवेशन सम्पन्न हुनु पार्टी जीवनका लागि गौरवको विषय पनि हो । सैद्धान्तिक, वैचारिक र कार्यक्रम सर्वसम्मत रूपमा तय भएको छ । लय भएको समाजवादी कार्यक्रमले आजको समाजका सबै खाले चुनौतीहरूको सामना गर्न सक्ने छ । साथै, नेतृत्व समेत सर्वसम्मत चयन होस भन्ने पार्टी पक्तिको भावना समेतलाई आत्मसात गर्दै हामी आठ प्रदेश कमिटीका अध्यक्षहरूको पटक–पटकको छलफल पश्चात श्रद्धेय पार्टी अध्यक्ष, सम्मानित नेता कमरेड र श्रद्धेय महासचिव कमरेड सर्वसम्मत नेतृत्व चयन गर्न समक्ष हुनेमा सबै प्रदेश अध्यक्षहरू पूर्ण विश्वस्त छौँ ।”

महाधिवेशन सिद्धान्त, विचार र कार्यक्रमका हिसाबले ऐतिहासिक हुने जनाइएको छ ।

“हाम्रो यो प्रयास विशुद्ध रूपमा पार्टी एकता एवं अनुभव र क्षमतामा आधारित पार्टी निर्माण होस भन्ने अभिप्रायबाट केन्द्रित रहेको छ । हाम्रो यो प्रयास महाधिवेशनको अन्तिमसम्म निरन्तर जारी रहने छ र हामीलाई विश्वास छ, एकतावद्ध र भव्यरूपमा यो महाधिवेशन सम्पन्न हुनेछ,” विज्ञप्तिमा भनिएको छ ।

एकीकृत समाजवादीको महाधिवेशन असार १६–२० गते काठमाडौंमा हुँदै छ ।