काठमाडौं । रक्षामन्त्री मानवीर राईले तीनकुने घटनाका दोषीहरूलाई कानुनी कठघरामा उभ्याउने प्रतिबद्धता व्यक्त गरेका छन् । बिहीबार काठमाडौंमा आयोजित एक कार्यक्रममा उनले यस्तो बताएका हुन् ।

उनले तीनकुने घटनामा देशकै बेइज्जत हुनेगरी सुपरमार्केट, मिडिया तथा व्यवसायमाथि आक्रमण भएकोप्रति दुःख प्रकट गरे । उद्योग व्यवसायीहरूको सुरक्षाका लागि सरकार लागि पर्ने उनको भनाइ छ ।

मन्त्री राईले उद्योग व्यवसायीले विगतमा भएका कठिन र जटिल समयमा दुःख कष्ट झेलेर नेपालको आर्थिक क्षेत्रमा ठूलो योगदान गरेको बताए । उद्योग व्यवसायीको सहजताका लागि कानुनी जटिलता फुकाउने प्रयास भइरहेको उनको भनाइ छ ।