काठमाडौं । आईसीसी ट्वान्टी–२० विश्वकपको दोस्रो सेमिफाइनलमा मैदान उत्रिँदा भारत साविक विजेता इंग्ल्यान्डविरुद्ध दुई वर्षअघिको नमिठो हार भुलाउने लक्ष्यमा हुनेछ । दुई वर्षअघि अस्ट्रेलियाको एडलेड ओभलमा भएको ट्वान्टी–२० विश्वकपको दोस्रो सेमिफाइनलमा नै भारतलाई १० विकेटले हराउँदै इंग्ल्यान्डले फाइनल यात्रा तय गरेको थियो । 

फाइनलमा अर्को दक्षिण एसियाली मुलुक पाकिस्तानलाई पाँच विकेटले हराएपछि इंग्ल्यान्ड विश्वकप च्याम्पियन बनेको थियो । भारतले सन् २००७ मा भएको ट्वान्टी–२० विश्वकपपछि उपाधि जितेको छैन । विश्व क्रिकेटको सबैभन्दा ठूलो राष्ट्र भए पनि भारतको सिनियर टिमले पछिल्लो १३ वर्षयता आईसीसीका कुनै पनि उपाधि जित्न सकेको छैन । यसैकारण भारत जारी विश्वकपमा यो खडेरीको अन्त्य गर्ने लक्ष्यमा छ । 

“स्पष्ट भन्नुपर्दा २०२२ र अहिलेमा खास परिवर्तन भएको छैन । हामी पछिल्लो दुई–तीन वर्षयता खुला मानसिकतासाथ ट्वान्टी–२० क्रिकेट खेल्ने रणनीतिमा छौँ । त्यसैकारण त्यस्तो धेरै केही परिवर्तन भएको छैन,” भारतीय कप्तान रोहित शर्माले खेलअघिको पत्रकार सम्मेलनमा भने, “हामी चलाख क्रिकेट टिम बन्न चाहन्छौँ । जसरी हामीले पछिल्लो र त्यसअघिका खेलहरू खेलेका थियौँ । हाम्रो प्राथमिकता भनेको सबै कुराहरुलाई सामान्य राख्नु हो ।” 

इंग्ल्यान्डका प्रशिक्षक म्याथ्यु मोटले पनि भारतीय टिम उत्कृष्ट रहेको बताए । उनले भारतीय चुनौतीका लागि आफ्नो टिम तयार रहेको जनाए । “भारतविरुद्धको खेल ठूलो अवसर हो । उनीहरूको टिम निकै राम्रो छ । हाम्रा लागि ठूलो चुनौती छ । तर, हामी यसका लागि उत्साहित छौँ । दुई वर्षअघि इंग्ल्यान्डले भारतविरुद्ध राम्रो ब्याटिङ गरेको थियो,” इंग्ल्यान्डका प्रशिक्षक म्याथ्यु मोटले भने, “तर, अहिले उनीहरूको टिममा धेरै परिवर्तन भइसकेको छ । पछिल्लो केही वर्षयता उनीहरूले पावर प्लेको भरपूर उपयोग गर्ने र खेललाई अघि बढाउने रणनीति लिएका छन् । रोहितले उत्कृष्ट ब्याटिङ गरिरहेका छन् । तर, पनि हामी यो अनौठो चुनौतीका लागि तयार छौँ ।” 

दोस्रो सेमिफाइनल खेलअघि वर्षाको उच्च सम्भावना रहेको अन्तर्राष्ट्रिय सञ्चारमाध्यमहरूले जनाएका छन् । जारी विश्वकपको यो सेमिफाइनलका निम्ति आईसीसीले ‘रिजर्भ डे’ राखेको छैन । यसैकारण यो खेल वर्षाले प्रभावित बने नतिजाका कम्तीमा दुवै टिमबाट १० ओभरको खेल हुनुपर्नेछ ।

आईसीसीले यस खेलका लागि निर्धारित समयभन्दा २५० मिनेट ढिलोसम्म सञ्चालन गर्न सकिने प्रावधान पनि राखेको छ । तर, पनि वर्षाका कारण खेल रद्द भए भारत प्रतियोगिताको फाइनलमा प्रवेश गर्नेछ । आईसीसीको नियमअनुसार सुपर–८ मा समूह विजेता बनेकाले भारत अघि बढ्ने समीकरण बनेको हो ।