काठमाडौं । जर्मनीमा जारी युरो–२०२४ को प्रि–क्वार्टरफाइनल समीकरण पूरा भएको छ । प्रतियोगितामा बुधबार समूह चरणअन्तर्गतका अन्तिम खेलहरू भएका थिए । जसबाट समूह ‘इ’ र ‘एफ’ का तीन टोलीको टुंगो लागेको हो । 

प्रतियोगिताको समूह ‘ए’ बाट घरेलु टिम जर्मनी र स्वीट्जरल्यान्ड्ले अन्तिम–१६ को यात्रा तय गरे । समूह ‘बी’ बाट स्पेन शीर्ष र साविक उपविजेतासमेत रहेको इटाली दोस्रो स्थानमा रहँदै नकआउट चरणमा प्रवेश गरे । 

समूह ‘सी’ बाट साविक उपविजेता इंग्ल्यान्ड समूह विजेता, डेनमार्क उपविजेता र स्लोभेनिया तेस्रो स्थानमा रहँदै प्रि–क्वार्टरफाइनलमा प्रवेश गरे । यस्तै, समूह ‘डी’ बाट अस्ट्रिया शीर्ष स्थानमा रहँदा फ्रान्स दोस्रो र नेदरल्यान्ड्स तेस्रो स्थानमा रहेर अन्तिम–१६ को यात्रा तय गरे । 

समूह ‘इ’ बाट रोमानिया, बेल्जियम र स्लोभाकियाले नकआउट चरणमा स्थान बनाए । समूह ‘एफ’ बाट पोर्चुगल समूह विजेता, टर्की उपविजेता र जर्जिया तेस्रो स्थानमा रहँदै प्रि–क्वार्टरफाइनलमा प्रवेश गरे । 

नकआउटमा भिड्दै बेल्जियम र फ्रान्स 
प्रतियोगिताको नकआउट चरणका खेलहरू जुन २९ देखि सुरु हुनेछ । नकआउट चरणमा साविक विजेता इटालीले स्वीट्जरल्यान्डको सामना गर्नेछ । साविक उपविजेता इंग्ल्यान्डले स्लोभाकियाले प्रतिद्वन्द्वी पाएको छ । नेदरल्यान्ड्सले रोमानियाविरुद्ध प्रतिस्पर्धा गर्नेछ । अस्ट्रियासामु टर्कीले चुनौती प्रस्तुत गर्नेछ । 

यस्तै, जर्मनीले डेनमार्कविरुद्ध खेल्नेछ । स्पेनले जर्जियासँग प्रतिस्पर्धा गर्नेछ । कतार विश्वकप–२०२२ को उपविजेता र त्यसअघि २०१८ को विश्वकप विजेता फ्रान्सले बेल्जियमविरुद्ध प्रतिस्पर्धा गर्ने भएको छ । नकआउट चरणको सबैभन्दा प्रतिक्षित बनेको यो खेल जुलाई १ मा हुनेछ । यस्तै, प्रि–क्वार्टरफाइनलको अन्तिम खेलमा पोर्चुगलले स्लोभेनियाविरुद्ध खेल्ने तालिका छ ।