बेइजिङ । चीनमा एकैसाथ दुईखाले मौसमले हैरान पारेको छ । दक्षिणी चीनमा भीषण वर्षा र बाढीका कारण दशौं हजार मानिस बसोबास छोडेर हिँड्न बाध्य भएका छन् भने उत्तरी चीनमा हिट वेभ तथा खडेरीको सम्भावनालाई लिएर किसान चिन्तित्  छन् ।

बाढीका कारण कम्तिमा एक जनाको मृत्यु भएको जनाइएको छ । एक विद्यार्थीको शव दुई दिनपछि भेटिएको थियो ।  गाउन्सी क्षेत्रमा भीषण वर्षाका कारण घरहरू डुबानमा छन् ।

पूर्वमा पहिरो र बाढीले गर्दा फुजियान प्रान्तमा ३६ हजार मानिसलाई सुरक्षित स्थानमा सारिएको सरकारी मिडियाले जनाएका छन् । यो वर्षको सुरूमा पनि भीषण वर्षा र आँधीका कारण पूर्वी जियान्सी प्रान्तमा सातजनाको मृत्यु भएको थियो ।

बेइजिङको तापक्रम ३८ डिग्री सेल्सियस

चीनको राजधानी बेइजिङमा गएका हप्तादेखि उच्च तापक्रम रहँदै आएको छ । राष्ट्रिय मौसम केन्द्रले हिट वार्निङ जारी गरेको छ  । सोमबार बेइजिङ आसपासका क्षेत्रमा तापक्रम ३८ डिग्री सेल्सियससम्म पुगेको थियो ।

‘हट वेदर’ ताइवान क्षेत्रमा पनि रिपोर्ट गरिएको छ । वर्षाको अभावका कारण उत्तरी चीनमा यसपालि उत्पादनको विषयलाई लिएर चासो र चिन्ता बढिरहेको छ । शनिबार चीनका उपप्रधानमन्त्री लिउ गुझोङले बेइजिङसँग सीमा जोडिएको क्षेत्र हेबेइ प्रान्तमा गएर खडेरीबाट जोगिने प्रयत्नका लागि आह्वान गरेका थिए । एपी