काठमाडौं । काठमाडौंमा आज दिनभर बदली (आकाशमा बादल) र वर्षाको सम्भावना छ । यस दिन काठमाडौंमा पूर्ण रूपमा घाम लाग्ने सम्भावना कम रहेको मौसम पूर्वानुमान महाशाखाले जनाएको छ ।

काठमाडौंमा हल्का वर्षाको सम्भावना रहेको महाशाखाका मौसमविद् गोविन्द झाले जानकारी दिए । दिउँसो, साँझ वर्षाको सम्भावना रहेको उनले बताए ।

“बिहान वर्षा भएको थियो, अहिले भएको छैन । दिउँसो २/३ बजेपछि फेरि वर्षा हुने सम्भावना छ,” उनले बाह्रखरीसित भने, “साँझ पनि वर्षाको सम्भावना छ ।”

तर, लगातार पानी नपर्ने उनले स्पष्ट पारे । पर्ने, रोकिने हुने र बेलाबेलामा बादल फाट्ने सम्भावना पनि रहेको उनले बताए ।

“लगातार झरी पर्दैन । पर्ने, रोकिने, फेरि पर्ने हुन्छ,” उनले भने, “बेलाबेलामा बादल फाटेर अलिअलि घाम लागेजस्तो, उज्यालोजस्तो पनि हुने सम्भावना छ । तर, राम्रोसँग घाम लाग्ने, मौसम खुल्ने देखिँदैन ।”

हाल देशको पूर्वी भूभागमा मनसुन प्रणालीको प्रभाव छ । बाँकी भूभागमा स्थानीय, पश्चिमी वायु र भारतको बिहार आसपासको न्यूनचापीय क्षेत्रको प्रभाव रहेको उनले बताए ।

कोसीबाहेक वाग्मती, गण्डकी प्रदेशमा स्थानीय, पश्चिमी वायुका कारण वर्षाको सम्भावना रहेको उनले जानकारी दिए । कोसीका अधिकांश भूभागमा भने मनसुनका कारण वर्षा भइरहेको उनले उल्लेख गरे । हालसम्म मनसुन कोसी प्रदेशबाट अन्यत्र नफैलिएको उनले बताए ।

कोसीमा भारी वर्षा
पछिल्लो ६ घण्टा (आइतबार बिहान साढे १० बजे दिएको जानकारी)मा कोसी प्रदेशका केही स्थानमा भारी वर्षा मापन गरिएको छ । यो अवधिमा इलाममा १३० मिलिमिटर वर्षा मापन गरिएको मौसमविद् झाले जानकारी दिए ।

यस्तै, धनकुटामा ४९.६ मिलिमिटर वर्षा मापन गरिएको उनले बताए । “यो पनि भारी वर्षा नै हो,” उनले भने, “कोसीका केही स्थानमा भारी वर्षा भएको छ । मध्यमसम्म वर्षा त धेरै स्थानमा भएको छ ।”

यो वर्षको मनसुन यही जुन १० (जेठ २८) मा नेपाल भित्रिएको थियो । नेपालको पूर्वी भूभागमा मनसुन भित्रिएको हो । हरेक वर्ष पूर्वी भूभागबाटै नेपालमा मनसुन भित्रिने गर्छ ।

पश्चिम तराई भूभागमा आज पनि गर्मीको सम्भावना रहेको महाशाखाले जनाएको छ ।

• पश्चिम तराईमा अझै चार दिन तातो लहरको चेतावनी