![कुवेत आगलागी : भवनमा रहेका पाँच नेपालीको अवस्था कस्तो छ ?](https://12khari.top/uploads/posts/Agali-in-Kuwait-1718187988.jpg)
काठमाडौं । कुवेतको दक्षिणी सहर मङ्गाफ सहरको विदेशी कामदार बस्ने एक ६ तले भवनमा बुधबार आगलागी हुँदा त्यहाँ तीन नेपाली रहेका थिए । उक्त भवनमा पाँच नेपाली रहने भए पनि घटना हुँदा दुई नेपाली बाहिर रहेको एनबीटीसी ग्रुपले कुवेतस्थित नेपाली दूतावासलाई जानकारी दिएको छ । एनबीटीसी ग्रुपले कामदारहरूलाई उक्त भवनमा राखेको थियो ।
“हामीलाई प्राप्त जानकारीअनुसार आगलागी हुँदा भवनमा तीन नेपाली रहेका थिए । भाग्ने क्रममा एक नेपाली सामान्य घाइते भएको हुँदा उनी अस्पताल गएनन् । दुई नेपालीको अहिले स्थानीय अस्पतालमा उपचार भइरहेको छ,” कुवेतका लागि नेपाली राजदूत घनश्याम लम्सालले बाह्रखरीसँग भने ।
आगलागी हुँदा भवन बाहिर रहेका दुई नेपाली सुरक्षित रहेको जानकारी कम्पनीले नेपाली दूतावासलाई दिएको छ । “रोजगारदाता कम्पनीले आगलागी हुँदा दुई नेपाली उक्त भवनमा नरहेको र उनीहरू सुरक्षित रहेको बताएको छ । तर, उनीहरू दुवैसँग हाम्रो कुराकानी भने हुन सकेको छैन,” राजदूत लम्सालले बताए ।
आगलागी स्थानीय समयअनुसार बुधबार बिहान ६ बजेबाट सुरू भएको थियो । आगलागीमा परी उक्त भवनमा रहेकामध्ये ४९ जनाको मृत्यु भएको थियो । मृत्यु हुनेहरू ४० जनाभन्दा बढी भारतीय कामदार रहेको अनुमान गरिएको छ ।
धैरै जनाको मृत्यु धुवाँले निस्सासिएर भएको जनाइएको छ । कम्पनीले भवनमा १९५ विदेशी कामदार राखेको थियो । आगलागी भएको समयमा भवनमा १६० कामदार रहेका थिए । आगलागीमा परी ५० जना घाइते भएका छन् । घाइतेहरूको अदन, जाबेर, फवानिया, मुबारक अल कबीर र जहार गरी पाँच सरकारी अस्पतालमा उपचार भइरहेको छ ।
पछिल्लो दुई दशकमा कुवेतमा आगलागीले गरेको यो दोस्रो सबैभन्दा ठूलो मानवीय क्षति हो । यसअघि सन् २००९ मा जाहरामा एक महिलाले आफ्नो पतिले दोस्रो विवाह गरेको रिसमा विवाह मण्डपमा आगो लगाइदिँदा ५६ महिला तथा बालबालिकाको मृत्यु भएको थियो ।
स्थानीय मिडियाका अनुसार कुवेतका गृहमन्त्री शेख फहद अल–यूसुफ अल–सबाहले आगलागी भएको भवनको मालिकलाई पक्राउ गर्न आदेश दिएका छन् । उक्त भवनमा कामदार राख्ने रोजगारदाता कम्पनीको मालिकलाई पनि पक्राउ गर्न आदेश दिइएको छ ।
कुवेतको गृह मन्त्रालयले भवन मालिक र रोजगारदाता कम्पनीको मालिकका लोभका कारण दुर्घटना भएको बताएको छ । क्षमताभन्दा बढी कामदार भवनमा राखिएको पनि मन्त्रालयले जनाएको छ ।
कुवेतको गृह मन्त्रालयले घटनाको अनुसन्धान भइरहेको र दोषीलाई कारबाही गर्ने आश्वासन दिएको छ । मन्त्रालयले विदेशी कामदार राखिएका कुवेतका अन्य भवनको पनि अनुसन्धान गर्न भनेको छ । क्षमताभन्दा बढी कामदार राख्ने भवन मालिक र कम्पनीलाई कारबाही अगाडि बढाउन भनिएको छ ।