काठमाडौं । अमेरिका, क्यानडा, फ्रान्सलगायत मुलुकमा पठाइदिने भन्दै १५ करोड रुपैयाँभन्दा बढी रकम ठगी गर्ने गिरोहलाई प्रहरीले पक्राउ गरेको छ । नेपाल प्रहरीको उपत्यका अपराध अनुसन्धान कार्यालयको टोलीले गिरोहका ‘नाइके’सहितको समूहलाई सोमबार (हिजो) नियन्त्रणमा लिएको हो । प्रहरीले मंगलबार उनीहरूलाई सार्वजनिक गरेको छ ।

गिरोहका एकजनालाई भारतको नयाँ दिल्लीबाट पक्राउ गरेर नेपाल ल्याइएको थियो । पक्राउ पर्नेमा चितवनका २८ वर्षीय राजकुमार भट्ट, कास्कीका २३ वर्षीय पवन पन्त र कास्कीकै २२ वर्षीय नवीन विक छन् ।

उनीहरूले वैदेशिक रोजगारीमा विभिन्न मुलुक पठाइदिने भन्दै करिब ३०० जनाबाट करोडौँ रकम असुल गरेको उक्त कार्यालयका एसएसपी सानुराम भट्टराईले जानकारी दिए । भट्टको समूहले १५ करोड रुपैयाँभन्दा बढी रकम ठगी गरेको खुलेको प्रहरीले जनाएको छ ।

एसएसपी भट्टराईका अनुसार, भट्टको समूहले विभिन्न मुलुक पठाइदिने भन्दै फेसबुकमार्फत विज्ञापन गर्ने गरेको थियो । पीडितलाई विभिन्न ठाउँमा बोलाएर युरोप, अमेरिका पठाइदिने भन्दै मोटो रकम लिएर उनीहरू सम्पर्कविहीन हुने गरेका प्रहरीले जनाएको छ ।

प्रहरीका अनुसार, उनीहरूले रविन आले, महेश थापा र थापा हरिका नामबाट नक्कली फेसबुक आईडी बनाएर ठगी गरेका थिए । समूहका नाइके भट्ट भएको प्रहरीले जनाएको छ । उनले पीडितले पठाएको रकम अरू व्यक्तिको खातामार्फत प्रयोग गर्ने गरेको पाइएको छ ।

भट्टको समूहले पीडितबाट रकम संकलन गर्न विभिन्न व्यक्तिका नागरिकता र बैंक खाता दुरुपयोग गरेको प्रहरी अनुसन्धानका क्रममा खुलेको छ । प्रहरीले भट्टमाथि ठगी मुद्दामा अनुसन्धान जारी राखेको छ ।

पीडित नै थुनामा
भट्टबाट ठगिएका पीडित नै जेल पुगेको पनि प्रहरी अनुसन्धानका क्रममा खुलेको छ । वैदेशिक रोजगार विभागमा परेको उजुरीका आधारमा उनीहरू जेल पुगेका हुन् ।

भट्टबाट ठगिएका सातजना जेल पुगेको खुलेको छ । विभागको न्याय निरूपण इकाइले उल्टै पीडितसँग मोटो रकम माग गरेपछि धरौटी बुझाउन नसकेर उनीहरू जेल पुगेका हुन् ।

उनीहरूलाई डिल्लीबजार कारागारमा राखिएको छ । जेल पुग्नेहरूमा सुनबहादुर बुढा, राजुकमार बस्नेत, प्रभाकर भट्टराई, हरिबहादुर कामी, शेरबहादुर तामाङसहितका व्यक्ति छन् ।

उनीहरूका बैंक खाता प्रयोग गरिएको देखिएपछि पीडितले वैदेशिक रोजगार  विभागमा उजुरी दिएका थिए । सोही उजुरीका आधारमा विभागले अनुुसन्धान सुरु गरेको थियो । तर, उनीहरू आफैँ पीडित भएको खुलेको प्रहरीले जनाएको छ ।

जेल पुगेका मध्ये बस्नेतसहितका पीडितले प्रहरीमा उजुरी नै दिएका छन् । भट्टले ठगी गर्ने उद्देश्यले बस्नेतसहितका व्यक्तिका बैंक खातामा रकम जम्मा गर्न लगाउने र पछि उनीहरूलाई नगद झिक्न लगाएर लिने गरेका थिए ।

उनीहरूलाई आफ्नो निजी कम्पनीमा काम लगाइदिने भन्दै भट्टले बैंक खाता खोल्न लगाएका थिए । उनीहरूका उक्त खातामा भट्टले अरू पीडितलाई रकम जम्मा गर्न लगाउने गरेको खुलेको छ ।