काठमाडौं । टिकटकले केही ब्रान्ड र सेलिब्रेटीको टिकटक अकाउन्ट साइबर आक्रमण भएको जनाउँदै यसबारेमा आफूले सम्बोधन गरिरहेको जनाएको छ । 

चिनियाँ कम्पनी बाइट डान्सले सीमित मात्रामा अकाउन्ट ‘कम्प्रोमाइज’ भएको पाइएको उल्लेख गरेको छ । उसले आफू प्रयोगकर्ताहरूसँग मिलेर अकाउन्ट पुर्नस्थापना गर्न लागि रहेको समेत उल्लेख गरेको छ ।

टिकटकले त्यसभन्दा बढी थप जानकारी दिन चाहेन । जनाइएअनुसार एउटा कम्प्रोमाइज गरिएको अकाउन्ट सीएनएनको पनि हो । सीएनएनसँग मिलेर आफूले सो अकाउन्टमा पहुँच पुर्‍याउन लागिपरेको र थप सुरक्षा प्रबन्धको प्रयास भएको टिकटकले जनाएको छ ।  

सीएनएनलाई यसबारेमा बीबीसीले जिज्ञासा राख्दा उसले प्रतिक्रिया गर्न चाहेन । टिकटकका अनुसार रियालिटी टीभीका स्टार पेरिस हिल्टनको अकाउन्ट पनि कम्प्रोमाइज गर्ने प्रयास गरिएको तर, उनको अकाउन्ट भने कम्प्रोमाइज नभएको जनाइएको छ । हिल्टनका १० मिलियनभन्दा बढी फलोअर्स छन् र उनी सो प्लेटफर्मको सक्रिय प्रयोगकर्ता हुन् ।

अमेरिकामा टिकटकको स्वामित्व बेच्नुपर्ने वा  बन्द गरिने कानुन बनिसकेको छ । यद्यपि, राष्ट्रपतिका उमेदवार डोनाल्ड ट्रम्पले गत शनिबार टिकटक अकाउन्ट खोलेका छन् । गएको शनिबार यता मात्रै उनका पाँच मिलियन फलोअर्स भइसकेका छन् । उनले आफूले अमेरिकी जनतासँग प्रत्यक्ष रूपमा बोल्नका लागि उपलब्ध सबै प्रविधि प्रयोग गर्ने बताएका छन् । 

अमेरिकी राष्ट्रपति जो बाइडेनको पनि टिकटक अकाउन्ट छ । जसमा उनका प्रतिद्वन्द्वी ट्रम्पकोभन्दा तीन लाख ५० हजार कम फलोअर्स मात्र छन् । बीबीसी