काठमाडौं । राष्ट्रियसभा सदस्य कृष्णप्रसाद अधिकारीले अनशनमा रहेका दीपक भण्डारीको स्वास्थ्य अवस्था बिग्रदै गएको भन्दै सरकारको ध्यानाकर्षण गराएका छन् । 

मंगलबारको राष्ट्रियसभा बैठकमा बोल्दै उनले ‘अनशनमा रहेका दीपक भण्डारी लगायतका अनशनकारीहरूको अवस्था बिग्रिदै गएको’ भन्दै सरकारको ध्यानाकर्षण गराएका हुन् । 

नेपालको संविधानको मौलिक हकमा अपांगतासम्बन्धी भएको व्यवस्था मात्र होइन २०७७ मा अपांगता नियमावलीमा भएको व्यवस्थाअनुसार अति अशक्त जो सहाराविहीन रहेको उल्लेख गरे । यी संवेदनशील अवस्थामा भएका अपांगता भएकालाई सहयोगको व्यवस्था गर्ने भनी नियमावलीमा रहेको भन्दै सांसद भण्डारीले भने, “त्योअनुसार अहिले सम्बन्धित मन्त्रालयको म जनयुद्ध जनआन्दोलनका अपांगताहरू त्यसैगरी प्राकृतिक अपांगता भएका अति संवेदनशीलहरू हुनुहुन्छ जसको सहारा छैन उहाँहरूलाई एकजनाको सहयोगीको व्यवस्था गर्न म सम्बन्धित मन्त्रालयको ध्यानाकर्षण गर्दछु ।” 

भण्डारी काठमाडौंको शान्तिबाटिकामा अनशनमा बसेका छन् । सरकारसँगको सम्झौता कार्यान्वयन नभएको भन्दै अनशनमा बसेका हुन् । स्पाइनल कर्डको अपांगता भएका व्यक्तिलाई व्यक्तिगत वृत्ति, सहायक सामग्री र सामाजिक सहयोगको व्यवस्था गरिदिने सम्झौता भन्दै अपांगता भएका व्यक्तिहरूको समूह र महिला बालबालिका तथा जेष्ठ नागरिक मन्त्रालयसँग चैत १४ गते सम्झौता भए पनि कार्यान्वयन नभएको भन्दै उनी अनशनमा बसेका हुन् । उक्त सम्झौता एक महिनाभित्र कार्यान्वयन गर्ने प्रतिबद्धता व्यक्त गरिएको थियो ।