काठमाडों । आईसीसी ट्वान्टी–२० विश्वकपमा नेदरल्यान्ड्ससँग भिड्नुअघि नेपाली राष्ट्रिय क्रिकेट टिमले अमेरिकाको टेक्सासस्थित युलेसमा रहेको पशुपतिनाथ मन्दिर र बौद्ध विहारको दर्शन गरेको छ । नेदरल्यान्ड्ससँग प्रतिस्पर्धा गर्नुअघि टिमले युलेसस्थित पशुपतिनाथ मन्दिर र बौद्ध विहारमा पूजा–आराधना गरेको हो ।

नेपाली राष्ट्रिय क्रिकेट टिमले आज ट्वान्टी–२० विश्वकपअन्तर्गत नेदरल्यान्ड्ससँग आफ्नो पहिलो खेल खेल्दै छ । नेपाली समयानुसार राति सवा ९ बजे खेल सुरु हुनेछ ।

पूजाआजापछि सञ्चारकर्मीसँग नेपाल क्रिकेट संघ (क्यान)का अध्यक्ष चतुरबहादुर चन्दले नेपालले राम्रो तयारी गरिरहेको बताए । उनले नेपालले वेस्ट इन्डिज र अमेरिकामा गरी करिब एक महिना तयारी गरिसकेको उल्लेख गरे । टिमले राम्रो नतिजा निकाल्नेमा आशावादी रहेको उनले बताए ।

उनले सन् २०१४ भन्दा टिमले धेरै गुणा राम्रो तयारी गरेको सुनाए । खेलाडीले उत्कृष्ट प्रदर्शन गरेपछि मात्र सबैतिरको ढोका खुल्ने उनले बताए ।

“...२०१४ को भन्दा धेरै गुणा राम्रो तयारी छ । त्यो बेलामा यस्तो खालको तयारी कम हुने गर्दथ्यो । अहिलेको टिमले पनि उत्कृष्ट प्रदर्शन गर्ने आशा छ,” उनले भने, “खेलाडीहरूले खेलेर उत्कृष्ट प्रदर्शन गरेपछि मात्रै सबैतिरको ढोका खुल्ने हो । उच्च मनोबलका साथ खेल्नुस् भनेका छौँ । सब खेलाडी उत्साहित हुनुहुन्छ । टीयूकै झल्को दिने गरी दर्शकहरूको उपस्थिति हुनेछ ।”

उनले दर्शकको उपस्थिति पनि बाक्लो रहने बताए । न्युज एजेन्सी नेपाल