काठमाडौं । नेकपा (एकीकृत समाजवादी)का सांसद शेरबहादुर कुँवरले अछामस्थित बयलपाटा अस्पतालका निम्ति तत्काल आवश्यक बजेटको व्यवस्था गर्न सरकारसँग माग गरेका छन् ।

सरकारले बजेट नदिँदा उक्त अस्पताल बन्द हुने अवस्थामा पुगेको उनले बताए । यही असार मसान्तभित्र बजेटको व्यवस्था गरिनुपर्नेमा उनले जोड दिए ।

आइतबार प्रतिनिधिसभा बैठकमा विशेष समय लिएर सांसद कुँवरले आमनागरिकलाई निःशुल्क उपचार गराइरहेको उक्त अस्पतालको नौ करोड रुपैयाँ बजेट कटौती गर्ने काम सरकारले गरेको भन्दै आक्रोश व्यक्त गरे ।

“बयलपाटा हस्पिटल बन्द हुने अवस्थामा पुगेको छ । अछाममा निःशुुल्क उपचार गराएको सो अस्पतालमा सरकारले नौ करोड बजेट नदिँदा त्यहाँ कर्मचारी तलब खान नपाउने अवस्थामा पुगेका छन्,” उनले भने, “त्यसकारण तत्काल सो अस्पतालमा असार मसान्तभित्र बजेटको व्यवस्था गर्न म सरकारसँग माग गर्न चाहन्छु ।”

उनले बाढी, पहिरो, आगलागीबाट हुने क्षतिका निम्ति राहतको व्यवस्था गर्न पनि सरकारले ढिलाइ गर्न नहुने बताए । देशभरमा आगलागीबाट ठूलो क्षति भए पनि पीडितलाई राहत दिने विषयमा सरकारले ध्यान नदिएको भन्दै उनले गुनासो गरे । न्युज एजेन्सी नेपाल