काठमाडौं । देशका केही स्थानमा आइतबार (भोलि) वर्षाको सम्भावना छ । शनिबार पनि कोसी, वाग्मती (काठमाडौंसहित), गण्डकी प्रदेशलगायत केही स्थानमा वर्षा भएको मौसम पूर्वानुमान महाशाखाले जनाएको छ ।

आइतबार देशका धेरै स्थानमा आंशिकदेखि साधारणतया बदली (आकाशमा बादल)को सम्भावना रहेको महाशाखाका मौसमविद् रोजन लामिछानेले जानकारी दिए । कोसी, वाग्मती र गण्डकी प्रदेशका थोरै स्थानमा वर्षाको सम्भावना रहेको उनले बताए ।

“तराईमा पनि केही बदली त हुने सम्भावना छ, तर मुख्यतया सफा हुनेजस्तो देखिन्छ,” उनले बाह्रखरीसित भने, “विशेष गरी कोसी, वाग्मती र गण्डकी प्रदेशका थोरै स्थानमा वर्षाको सम्भावना छ । अरू एक/दुई स्थानमा पनि सम्भावना छ । हल्कादेखि मध्यम वर्षाको सम्भावना छ ।”

• देशभर तापक्रम केही घट्यो, यो वर्षकै बढी कहाँ कति ?

हाल देशमा स्थानीय, पश्चिमी वायु र भारतको उत्तर प्रदेशदेखि पश्चिम बंगलादेशसम्म फैलिएको न्यूनचापीय क्षेत्रको आंशिक प्रभाव रहेको महाशाखाले जनाएको छ । स्थानीय र पश्चिमी वायुका कारण काठमाडौंसहित शनिबार देशका विभिन्न स्थानमा वर्षा भएको उनले बताए ।

आइतबार काठमाडौंमा पनि वर्षाको सम्भावना रहेको उनले जानकारी दिए । काठमाडौंमा पनि हल्कादेखि मध्यम वर्षाकै सम्भावना रहेको उनले बताए । “काठमाडौंमा भोलि बिहानपख पनि पानी पर्ने सम्भावना छ,” उनले भने, “तर, दिउँसो वर्षाको सम्भावना बढी छ ।”

काठमाडौंमा आइतबार बिहान घामको पनि सम्भावना रहेको उनले बताए । दिउँसो भने बदली हुने देखिएको उनले स्पष्ट पारे । “बादल हुने, खुलेको जस्तो उज्यालो हुने, घामचाहिँ बिहान हुन्छ,” उनले भने, “दिउँसो, अपराह्न बादल र वर्षाको सम्भावना देखिन्छ । घामको सम्भावना छैन ।”

आइतबारको तुलनामा सोमबार र मंगलबार वर्षाको सम्भावना कम रहेको उनले बताए । नेपालमा मनसुन भित्रन अझै केही दिन लाग्ने देखिएको उनले उल्लेख गरे । नेपालमा मनसुनी प्रभाव सुरु नभएको उनले जानकारी दिए । स्थानीय र पश्चिमी वायुकै प्रभाव रहेको उनले स्पष्ट पारे ।

• मनसुनी प्रणाली भारतको सिक्किम आइपुग्यो 

पछिल्लो ६ घण्टाको वर्षाको विवरण । जल तथा मौसम विज्ञान विभागको वेबसाइटबाट शनिबार राति ८ः५० बजे लिइएको स्क्रिनसट ।