काठमाडौं । साउदी प्रो लिगमा अल नासरका कप्तान क्रिस्टियानो रोनाल्डोले कीर्तिमान बनाएका छन् । रोनाल्डोले प्रो लिगको एकै सिजन सबैभन्दा धेरै गोल गर्ने खेलाडीको कीर्तिमान बनाएका हुन् ।

प्रो लिगमा अल नासरले सोमबार अल इत्तिहादविरुद्ध ४–२ को जित निकाल्दा रोनाल्डोले दुई गोल गरेका थिए । उक्त दुई गोलसँगै प्रो लिगमा रोनाल्डोले कुल ३५ गोल पुर्‍याएका हुन् । उनले यसअघि सन् २०१८–१९ को सिजन अब्देररजाक हम्दल्लाहले गरेको ३४ गोलको कीर्तिमान तोडेका हुन् ।

जितसँगै अल नासरले ३४ खेलबाट ८२ अंकसहित तालिकाको दोस्रो स्थानमा रहेर लिग टुंग्याएको छ । समान खेलबाट ९६ अंक जोडेको अल हिलाल प्रो लिग च्याम्पियन बन्दा ६५ अंक जोडेको अल–अह्ली साउदी तालिकाको तेस्रो स्थानमा छ ।

सन् २०२३ मा ‘फ्रि ट्रान्सफर’ मा अल नासर अनुबन्धित भएका रोनाल्डोले हालसम्म ६९ खेल खेल्दा ६४ गोल गरेका छन् । यस्तै, स्पोर्टिङ लिस्बनबाट व्यावसायिक करियरको सुरुआत गरेका रोनाल्डोले हालसम्म म्यानचेस्टर युनाइटेड, रियाल मड्रिड र युभेन्टसबाट गरी कुल ७६५ गोल गरेका छन् ।

पोर्चुगलबाट २०६ खेल खेलेका रोनाल्डो १२८ गोलसहित अन्तर्राष्ट्रिय फुटबलमा सबैभन्दा धेरै गोल गर्ने खेलाडीसमेत हुन् ।