काठमाडौं । संघीय संसद्अन्तर्गत प्रतिनिधिसभाको आज दुईवटा बैठक बस्दै छ । पहिलो बैठक दिउँसो १ बजे बस्नेछ । जसमा आगामी आर्थिक वर्षको बजेट पेस हुनेछ । 

आजै संसद्को दोस्रो बैठक बस्दै छ । बैठक अपराह्न ४ बजे बस्नेछ । उक्त बैठकमा सभामुख देवराज घिमिरेले प्रधानमन्त्री तथा मन्त्रिपरिषद्को कार्यालयबाट प्राप्त कार्यभार थपसम्बन्धि पत्र पढेर सुनाउनेछन् । 

बैठकको अध्यक्षता गर्ने सदस्यहरूको मनोनयन, शिक्षा, स्वास्थ्य तथा सूचना प्रविधि समितिका सभापति अम्मरबहादुर थापाले ‘सुरक्षण मुद्रण सम्बन्धी विधेयक सम्बन्धी समितिको प्रतिवेदन, २०८०’ पेस गर्ने सम्भावित कार्यसूची रहेको छ । 

सांसद प्रेम सुवालले ‘लगानी सहजीकरण सम्बन्धि केही नेपाल ऐनलाई संशोधन गर्ने अध्यादेश, २०८१ लाई अस्वीकार गरियोस्’ भन्ने सूचना प्रस्तुत गर्नेछन् । 

उद्योग, वाणिज्य तथा आपूर्तिमन्त्री दामोदर भण्डारीले ‘लगानी सहजीकरण सम्बन्धी केही नेपाल ऐनलाई संशोधन गर्ने अध्यादेश, २०८१’ स्वीकृतका लागि प्रस्ताव गर्ने, अर्थमन्त्री वर्षमान पुनले आर्थिक वर्ष २०८१/०८२ को राजस्व र व्ययको वार्षिक अनुमानको प्रति टेबुल गर्ने सम्भावित कार्यसूची छ । 

अर्थमन्त्री वर्षमान पुनले नै ‘आर्थिक विधेयक, २०८१’ पेस गर्ने सम्भावित कार्यसूची रहेको संसद् सचिवालयले जनाएको छ ।