काठमाडौं । प्रमुख प्रतिपक्ष दल नेपाली कांग्रेसले सत्तापक्ष सहकारी समस्या समाधान गर्न गम्भीर नभएको आरोप लगाएको छ । सोमबार प्रधानमन्त्रीको सरकारी निवास बालुवाटारमा प्रधानमन्त्रीसहित कांग्रेस, एमाले, माओवादी केन्द्र र रास्वपाका शीर्ष नेताहरूकाे बसेको बैठकपछि सञ्चारकर्मीसँग कुरा गर्दै कांग्रेस सांसद जीवन परियारले यस्तो आरोप लगाएका हुन् । 

उनले प्रधानमन्त्री पुष्पकमल दाहाल ‘प्रचण्ड’ सहकारी प्रकरणमा संसदीय छानबिन समिति बनाउन सकारात्मक भए पनि सत्तापक्षका अन्य राजनीतिक दलहरु गम्भीर नभएको बताए । कांग्रेसले लामो समयदेखि सहकारीपीडितहरूको अविलम्ब बचत रकम फिर्ताको सुनिश्चितता खाजेको उनको भनाइ छ । 

सहकारीको बचत रकम अपचलनमा उपप्रधान एवं गृहमन्त्री रवि लामिछानेको संलग्नता रहेको र छानबिनका लागि संसदीय समिति गठनको माग गर्दै आएको छ । सांसद परियारले सही ढंगबाट छानबिन हुनुपर्ने कांग्रेसको माग रहेको बताए । 

“हामी अत्यन्त गम्भीर भएका छौँ । नेपाली कांग्रेस पार्टीले लामो समयदेखि अघिल्लै सदनदेखि नै लाखौँ लाख सहकारीपीडितहरू, बचतकर्ताहरूको बचतको सुरक्षा र ति पीडितहरूले अविलम्ब आफ्नो बचत रकम फिर्ताको सुनिश्चितता खोजेका छन् । पहिलो प्राथमिकता त्यसमा छ । सहकारी विभागले समस्याग्रस्त सहकारीको सूची सार्वजनिक गर्ने गरेको छ । अहिले ६ दर्जन सहकारी संस्थाले रकम अपचलन गरेको कुरा हामीले सुन्दै आएका छौँ,” उनले भने, “लाखौँ लाख बचतकर्ताको रकम कसरी बचतकर्ताको हातमा पुग्छ, पहिलो प्राथमिकता छ । हामीले माननीय उपप्रधान एवं गृहमन्त्री रवि लामिछानेजीले गोरखा मिडिया नेटवर्कमा रहँदा विभिन्न सहकारीबाट करोडौँको रकम गोरखा मिडिया नेटवर्कमा र गोरखा मिडिया नेटवर्कमा विभिन्न कम्पनी र व्यक्तिमार्फत रकम पुगेका छन् । त्यसको सही ढंगबाट छानबिन हुनुपर्छ भन्ने नेपाली कांग्रेसको धारणा हो । सत्ता पक्षले प्रस्तावमा सकारात्मक छाँै भन्ने र कहिले गलत व्याख्या गरिदिने कुराले अन्योलता आएको छ । हामीले जनताको बचत रकम फिर्ता र सुनिश्चित गर्ने कुरामा केन्द्रित छाैँ । प्रधानमन्त्रीको पहल कदमी सकारात्मक छ । तर, सम्पूर्ण सत्ता पक्ष समस्या समाधान भन्नेतर्फ भन्दा पनि समस्यालाई अल्झाइरहने जस्तो देखिन्छ ।”