काठमाडौं । प्रधानन्यायाधीश विश्वम्भरप्रसाद श्रेष्ठले स्वतन्त्र न्यायपालिकाविनाको प्रेस स्वतन्त्रता र स्वतन्त्र प्रेसविनाको स्वतन्त्र न्यायपालिकाको परिकल्पना गर्न नसकिने बताएका छन् । शुक्रबार साँझ काभ्रेपलाञ्चोकको धुलिखेलमा सर्वोच्च अदालत र संवैधानिक तथा न्यायिक पत्रकार मञ्चको आयोजनामा भएको अदालती रिपोर्टिङ र सञ्चारमाध्यम विषयक कार्यशालालाई सम्बोधन गर्दै उनले यस्तो बताएका हुन् । 

उनले न्यायपालिका र सञ्चारजगत लोकतन्त्रका महत्वपूर्ण आधारस्तम्भ भएको बताए । उनले न्यायपालिका र सञ्चारजगतको अभावमा लोकतन्त्र बलियो हुन नसक्ने जिकिर गरे । उनले स्वतन्त्र न्यायपालिका र प्रेस स्वतन्त्रताको सुनिश्चितताविना कानुनको शासन समृद्ध बन्न नसक्ने बताए । 

नेपालको संविधानको प्रस्तावनामा नै पूर्णप्रेस स्वतन्त्रता, सक्षम, स्वतन्त्र र निष्पक्ष न्यायपालिकाको अवधारणालाई आत्मसाथ गरेको उल्लेख गर्दै स्वतन्त्र न्यायपालिका र प्रेस स्वतन्त्रतालाई एकअर्काको परिपूरक र अन्तरसम्बन्धित आवरण वा मान्यताका रूपमा लिने गरिएको बताए । उनले न्यायपालिका र सञ्चारक्षेत्रको भूमिका र जिम्मेवारी फरक भए पनि लक्ष्य, उद्देश्य एउटै रहेको बताए । 

प्रधानन्यायाधीश श्रेष्ठले न्यायपालिकाको आवाज भनेकै सञ्चारमाध्यम भएको बताए । उनले सञ्चारमाध्यमबाटै न्यायपालिकाको काम कारबाही र फैसलाको यथार्थ अवस्था आम नागरिकसमक्ष पुग्ने बताए । न्यायपालिकाप्रतिको आस्था र विश्वास अभिवृद्धि गर्न सञ्चार क्षेत्रको भूमिका उल्लेखनीय रहेको बताए । 
    
सर्वोच्च अदालतका न्यायाधीश हरिप्रसाद फुयाँलले अदालतको समाचार रिपोर्टिङलाई विशेष रिपोर्टिङका रूपमा स्थापित गराउनुपर्ने बताए । उनले राजनीतिक रिपोर्टिङबाट अदालती रिपोर्टिङलाई निकालेर छुट्टै विशेष रिपोर्टिङ बनाउन बाँकी रहेको बताए । 

न्यायाधीश फुयाँलले ‘हाइ प्रोफाइल केस’मा मिडिया ट्रायल हुने गरेको बताए । उनले अदालती रिपोर्टिङमा केही चुनौती अझै रहेको बताए । उनले अहिलेको अदालती रिपोर्टिङ राजनीतिक रिपोर्टिङसँग जोडेर लिने गरिएको उल्लेख गरे । न्यायाधीश फुयाँलले कतिपय न्यायाधीशहरू पनि मिडिया ट्रायलको प्रभावमा पर्ने गरेको भन्दै मिडिया ट्रायल प्रभावमा न्यायाधीशहरु बहकिनु नहुने बताए ।