काठमाडौं । पहिलो प्लेअफमा सनराइजर्स हैदराबादविरुद्ध आठ विकेटको सहज जित निकाल्दै कोलकाता नाइट राइडर्स इन्डियन प्रिमियर लिग (आईपीएल) को फाइनलमा प्रवेश गरेको छ ।

मंगलबार भएको खेलमा सनराइजर्स हैदराबादले प्रस्तुत गरेको १६० रनको लक्ष्य कोलकाताले १३.४ ओभरमा दुई विकेट गुमाएर पूरा गर्‍याे । कोलकाताको जितमा कप्तान श्रेयस ऐयरले सर्वाधिक ५८ रन बनाए । उनले २४ बलमा पाँच चौका र चार छक्का प्रहार गरे । यस्तै, वेन्कटेस ऐयरले पनि ५१ रन बनाए । उनले २८ बलमा पाँच चौका र चार छक्का प्रहार गरे । ओपनरद्वय रहमनुल्लाह गुर्बज र सुनिल नारिनले क्रमशः २३ र २१ रन बनाए ।

हैदराबादका प्याट कुमिन्स र टी नटराजनले समान एक विकेट लिए । त्यसअघि टस जितेर ब्याटिङमा आएको हैदराबादले १९.३ ओभरमा सबै विकेट गुमाएर १५९ रनको योगफल खडा गरेको थियो ।

हैदराबादका राहुल त्रिपाठीले सर्वाधिक ५५ रन बनाएका थिए । हेनरिक क्लासेनले ३२, कप्तान प्याट कुमिन्सले ३० र अब्दुल समदले १६ रन बनाए ।

कोलकाताका मिचेल स्टार्कले तीन विकेट लिए । वरुण चक्रवर्तीले दुई विकेट लिँदा वैभव अरोरा, हर्षित राना, सुनिल नारिन र आन्द्रे रसेलले समान एक विकेट लिए ।

जितसँगै फाइनलमा स्थान बनाएको कोलकाताले अब उपाधिका निम्ति दोस्रो प्लेअफको विजेतासँग खेल्नेछ । यता, हार बेहोरे पनि हैदराबाद प्रतियोगिताबाट बाहिरिसकेको भने छैन । हैदराबादले अब दोस्रो प्लेअफमा इलिमिनेट विजेतासँग खेल्ने अवसर पाउनेछ । आज इलिमिनेटरमा रोयल च्यालेन्जर्स बेंगलोर र राजस्थान रोयल्सबीच प्रतिस्पर्धा हुनेछ ।