काठमाडौं । नेकपा (माओवादी केन्द्र)का मन्त्रीहरूले पार्टी र पार्टी अध्यक्ष पुष्पकमल दाहाल ‘प्रचण्ड’ले दिएको गाडी प्रयोग गर्ने गरेको पाइएको छ । 

मंगलबार जारी गरिएको मन्त्रीहरूको सम्पति विवरणअनुसार पार्टीका वरिष्ठ उपाध्यक्ष समेत रहेका उपप्रधान तथा परराष्ट्रमन्त्री नारायणकाजी श्रेष्ठसँग प्रधानमन्त्री प्रचण्डले प्रयोगका लागि दिइएको गाडी रहेको उल्लेख छ । उनीसँग बा १० च ५७९८ नम्बरको महिन्द्रा गाडी रहेको विवरणमा खुलाइएको छ । प्रधानमन्त्री प्रचण्डसँग भने गाडी नरहेको सम्पत्ति विवरणमा उल्लेख गरिएको छ । 

त्यस्तै, पार्टीका उपहासचिव समेत रहेका अर्थमन्त्री वर्षमान पुनसँग पार्टीको गाडी रहेको खुलाइएको छ । बा ००१ अ ००९ नम्बरको हलुका गाडी रहेको जनाइएको छ । त्यसैगरी पार्टीका अर्का उपमहासचिव समेत रहेका उर्जा जलस्रोत तथा सिँचाइमन्त्री शक्तिबहादुर बस्नेतसँग पनि पार्टीको गाडी छ । बा ९ च ७४ नम्बरको स्कार्पियो पार्टीको नाममा रहेको जनाइएको छ । 

त्यस्तै, सञ्चार तथा सूचना प्रविधिमन्त्री रेखा शर्माको भने निजी गाडी छ । विवरणमा ३६ लाख बाराबरको होन्डाइ कार रहेको विवरणमा खुलाइएको छ । कार पारिश्रमिक र राष्ट्र बैंकबाट ऋण लिएर खरिद गरिएको उल्लेख छ । संस्कृति पर्यटन तथा नागरिक उड्ययनमन्त्री हितबहादुर तामाङसँग भने गाडी छैन ।