काठमाडौं । परराष्ट्रमन्त्री नारायणकाजी श्रेष्ठले आफ्नो बैंक खातामा एक लाख २२ हजार ९१८ रुपैयाँ रहेको जनाएका छन् । मंगलबार सार्वजनिक गरिएको सम्पत्ति विवरणमा मन्त्री श्रेष्ठले त्यसबारे जानकारी गराएका हुन् ।

उनले आफूले पार्टी अध्यक्ष पुष्पकमल दाहाल 'प्रचण्ड'ले दिएको गाडी प्रयोग गरिरहेको पनि जनाएका छन् । बा १० च ५७९८ नम्बरको महिन्द्रा गाडी पार्टी अध्यक्ष प्रचण्डले उपलब्ध गराएको विवरणमा उल्लेख छ ।

उनको गोरखाको सिरानचोक गाउँपालिका वडा नम्बर ८ मा तीन कित्ता जग्गा छ । जुन २०५८ सालमै पार्टीलाई हस्तान्तरण गर्ने घोषणा गरेको र हाल प्रक्रियामा रहेको विवरणमा उल्लेख छ ।

आफूसँग कुल ३९ रोपनी ५ आना ४ दाम पैतृक जग्गा रहेको जनाएका छन् ।