काठमाडौं । नेपाली कांग्रेसका महामन्त्री गगन थापाले उपप्रधान एवं गृहमन्त्री रवि लामिछानेले आइतबार प्रतिनिधिसभामा गरेको सम्बोधनलाई 'काउन्टर' दिएका छन् । संसद् बैठकलगत्तै पत्रकार सम्मेलन गरेर थापाले गृहमन्त्री लामिछानेले उठाएको विषयको जवाफ दिएका हुन् ।

त्यसक्रममा उनले ग्यालेक्सी टीभीको प्रबन्ध निर्देशक (एमडी) हुँदा ऋण लिने कुनै निर्णय नगरेको भन्ने तथ्यमा गम्भीर प्रश्न उठाए । थापाले १५ प्रतिशत सेयर होल्डर र प्रबन्ध निर्देशक भएका लामिछानेले भनेजस्तो निर्णय नै नगरी रातारात पैसा आउने परिकल्पना उनीबाहेक कसैले गर्न नसक्ने बताए ।

“उहाँ (रवि लामिछाने)ले बोल्दा (संसद् बैठकमा) म ध्यान दिएर सुनिरहेको थिएँ । गोरखा मिडिया नेटवर्कले चलाएको ग्यालेक्सी टीभीमा एमडी हुँदा कुनै निर्णय नगरेको भन्नुभयो । तपाईंहरू पनि कतिपयले कम्पनी चलाउनुभएको होला, एमडीले निर्णय नै नगरी रातारात पैसा आउँछ ?,” प्रश्न गर्दै लामिछानेले भने, “उहाँले टेलिभिजनको अडिट रिपोर्टमा पटक–पटक ऋण लिएको भनेर सिग्नेचर गर्नुभएको छ ।”

लामिछानेले आफूविरुद्ध उजुरी नभएको र कतै अभियोजन पनि नगरिएको भनेर अर्को झुट बोलेको थापाको आरोप छ । उनले लामिछानेले आफूले मात्र झुट नबोलेर प्रहरी महानिरीक्षकलाई पनि झुट बोल्न लगाएको जिकिर गरे ।

“उहाँविरुद्ध पोखरामा पूरक उजुरी परेको छ । त्यसमा सीआईबीले छानबिन गरेको छ । सुप्रिम, सूर्यदर्शन, स्वर्णलक्ष्मी प्रत्येकमा उहाँको नाम छ । सुप्रिमको अभियोजन हुँदा उहाँको नामसहित अभियोजन छ । तर, विपक्षी मात्र बनाइएको छैन,” थापाले भने, “उहाँ गृहमन्त्री भएपछि सीआईबीले  बैक खाताको कारोबार हेर्छु भनेको छ, त्यसलाई रोकिएको छ । छानबिन भइरहेका विषय उहाँ गृहमन्त्री भएपछि रोकेर अनुसन्धान गर्ने निकाय बचाउमा उत्रिनुपरेको छ ।”

महामन्त्री थापाले राष्ट्रिय स्वतन्त्र पार्टी (रास्वपा)का सभापति समेत रहेका लामिछाने मात्र नभएर उक्त पार्टीका अरू व्यक्ति पनि सहकारीको बचत अपचलनमा संलग्न रहेको आरोप लगाए । उनले सुप्रिम, सूर्यदर्शन, स्वर्णलक्ष्मी सहकारी संस्थामा संलग्न देखिएका व्यक्तिहरू हाम्रो कृषि सहकारीको काण्डमा पनि विवादमा तानिएको बताए । उनले संगठित ठगीको आशंका देखिएको भन्दै ती विषयमा विस्तृत अनुसन्धानले वास्तविकता उजागर हुने उल्लेख गरे ।

त्यसक्रममा उनले आफूहरूलाई नधम्क्याउन र नतर्साउन चेतावनी पनि दिए । उनले पद र शक्तिमा भएको गृहमन्त्रीले छानबिन समिति बनाए सबैको फाइल खोल्दा हुने बताए । 

“तपाईं गृहमन्त्री हुनुहुन्छ राजीनामा मागेको पनि छैन । तपाईं शक्तिशाली हुनुहुन्छ,” उनले भने ।

साथै उनले ह्यात, बालमन्दिरलगायतको फाइल खोल्न पनि अनुरोध गरे । “ह्यातको फाइल खोल्नुहोस्, बालमन्दिर कृषि अनुसनधानको विषय भन्नुभयो सबै खोल्नुहोस् । सबै छानबिन गर्नुहोस्,” उनले भने, “नधम्क्याउनुहोस्, नतर्साउनुहोस् नअलमल्याउनुहोस् ।”