बेइजिङ । युक्रेनसँग युद्ध चर्किरहेका बेलामा रुसका राष्ट्रपति भ्लादिमिर पुटिन बिहीबार चीनको राजधानी बेइजिङ पुगेका छन् । उनी दुईदिने भ्रमणका लागि चीन गएका हुन् । उनले बेइजिङ पुग्नासाथै चीनका समकक्षी सी जिनपिङसँग दुईपक्षीय वार्ता थालेका  छन् ।

सो भेटघाटलाई चिनियाँ मिडियाले सानो समूहको वार्ता (स्मल ग्रुप टक)को नाम दिएका छन् । बिहीबार बिहानको वार्ताको एजेण्डा सुरक्षा र विदेश मामिलाको विषय भएको र त्यसमा युक्रेन युद्ध अवश्य पर्ने जनाइएको छ ।

विश्लेषकहरूका अनुसार पुटिनले चीनसँग सहयोगको अपेक्षा गरेका छन् । त्यसमा आर्थिकसम्बन्ध तथा चीनमा उत्पादित उपकरण र प्रविधि पर्ने जनाइएको छ । जुन रुसको लागि जारी युद्धमा  जरुरी रहेको छ । 

सीले भने युक्रेनका सम्बन्धमा रुसको रणनीति र पुटिनले यसअघि चेतावनी दिएझैँ युद्धमा रासायनिक हतियार प्रयोग नहुने कुराको आश्वासन खोज्न सक्नेछन् ।  चीनले रसियाले युद्धमा कुनै पनि रासायनिक हतियार प्रयोग गरेमा त्यो चीनका लागि ‘रेड लाइन’ हुने जनाउँदै आएको छ ।

चीनका सामाजिक सञ्जालमा पुटिनको भ्रमणको निकै चर्चा भइरहेको छ । बिहीबार टिकटकमा पुटिनको बेइजिङ आगमन सबैभन्दा ट्रेन्डिङको विषय भइरहेको छ । सो आगमनको भिडियो ७० मिलियनभन्दा बढी प्रयोगकर्ताले हेरेका छन् । पुटिनलाई चीनका राष्ट्रपतिले ग्रेट हल अफ द पिपुलको पूर्वी गेट बाहिर चोकमा भव्य समारोहका बीच स्वागत गरेका थिए । 

सो अवसरमा रुसी सेनाको ब्यान्डले रुसी राष्ट्रियगान र त्यसपछि चिनियाँ राष्ट्रियगानले स्वागत गरेका थिए । ग्रेट हलमा नै अहिले वार्ता चलिरहेको बताइएको छ । पुटिन बिहान स्थानीय समय अनुसार ४ बजे नै बेइजिङ पुगेका हुन् । बीबीसी