काठमाडौं । छात्रवृत्ति सिटमा बंगलादेश जान सिफारिस भएका विद्यार्थीको सूची हेरफेर भएकोबारे शिक्षा विज्ञान तथा प्रविधिमन्त्री सुमना श्रेष्ठले बंगलादेशी राजदूतसँग छलफल गरेकी छिन् । मन्त्री श्रेष्ठले सोमबार नेपालका लागि बंगलादेशी राजदूत सलाहुद्दिन नोमान चौधरीसँग मन्त्रालयमा छलफल गरेकी हुन् । 

छलफलमा राजदूत चौधरीले समस्याका विषयमा बंगलादेश सरकार जानकार रहेको र यथाशीघ्र समाधान गर्ने तर्फ सकारात्मक पहल गर्ने बताएका थिए । यसबारे विज्ञप्ति जारी गर्दै शिक्षा मन्त्रालयले आगामी दिनमा यस्तो घटना नदोहोर्‍याउने गरी काम गर्ने प्रतिबद्धता समेत जनाएको  छ ।

बंगलादेशमा सरकारी छात्रवृत्तिमा एमबीबीएस र बीडीएस अध्ययनका निम्ति शिक्षा मन्त्रालयले सिफारिस गरेका २२ जनामध्ये १० जनाको नाम अन्तिम समयमा हेरफेर भएको थियो । 

मे ३० सम्म बंगलादेशका विभिन्न सरकारी कलेजमा भर्ना हुनपर्नेमा त्यहाँको डीजीएमइले प्रकाशित गरेको सूचीमा आफ्नो नाम नभएपछि १० जना विद्यार्थी न्याय खोज्दै मन्त्रालय पुगेका थिए ।