काठमाडौं । सत्यनिरूपण तथा मेलमिलाप आयोगमा ६३ हजार ७१८ उजुरी परेका छन् । बिहीबार सिंहदरबारमा बसेको संसद्को संघीयता सबलीकरण तथा राष्ट्रिय सरोकार समितिको बैठकमा आयोगका सचिव उदयराज सापकोटाले यसबारेमा जानकारी गराएका हुन् । 

उनका अनुसार एउटै घटनाको उजुरी धेरै छन् । जिल्लाको तहमा हेर्दा सल्यानमा पाँच हजार ५०२ वटा उजुरी परेको जानकारी दिएका उनले अछाम र कपिलवस्तुमा चार हजारभन्दा बढी उजुरी परेका छन् । तीन हजारभन्दा माथि उजुरी भएको जिल्ला एउटा र दुई हजारभन्दा माथि उजुरी भएका एउटा जिल्ला रहेको उनको भनाइ छ । सचिव सापकोटाका अनुसार एक हजारमाथि उजुरी भएका जिल्लाको संख्या १३ रहेको छ । 

“हामीसँग ६३ हजार ७१८ वटा छन् । एउटै घटनाको उजुरी पनि थुप्रै छन् । एउटा घटनाको एक हजार, १० हजार, १५ हजार पनि उजुरी हुनसक्छ । उजुरी भन्दा पनि घटनाका विषयहरुलाई हामीले हेरेर जानुपर्छ । जिल्लावाइजको उजुरीमा जाँदा पाँच हजारभन्दा बढी एउटै जिल्लामा पनि उजुरी भएको अवस्था छ । सल्यानमा पाँच हजारभन्दा बढी उजुरी रहेका छन् । पाँच हजार ५०२ उजुरी छन्,” उनले भने, “अछाम र कपिलवस्तुमा चार हजारभन्दा बढी उजुरी छन् । तीन हजारभन्दा माथि उजुरी भएको जिल्ला एउटा र दुई हजारभन्दा माथि उजुरी भएका एउटा छ । एक हजार माथि १३ वटा छन् । एक हजार भन्दा मुनिका अरु उजुरीहरू छन् ।” 

उनले सामान्य प्रकृतिका उजुरीको संख्या बढिरहेको जानकारी दिए । उनले अहिले दुई हजार २६८ उजुरीहरू तामेलीमा राखेको र केही उजुरी पुनः जगाउन पाउँ भनेर निवेदन आएको जानकारी दिए ।  “हामीले अहिले २ हजार २६८ उजुरीहरु तामेलीमा राखेका छाैँ । केही तामेलीबाट पुनः जगाउन पाउँ भनेर निवेदन आएको छ । परिचय पत्र वितरण ६१८ वटा गरेका थियौँ,” सचिव सापकोटाले भने । 

मेलमिलाप हुनसक्ने खालका घटनाहरू मेलमिलापकै रूपमा जानपर्ने उनको भनाइ छ ।