काठमाडौं । जापानकी विदेशमन्त्री योको कामिकावा नेपाल आउने भएकी छन् । उनी एक दिनका लागि वैशाख २३ नेपाल भ्रमणमा आउने परराष्ट्र मन्त्रालयका प्रवक्ता अमृत राईले जानकारी दिए । 

उनको नेपाल भ्रमणका क्रममा नेपाल–जापान प्रतिनिधिमण्डलस्तरीय द्विपक्षीय बैठक हुनेछ । बैठकमा नेपालको नेतृत्व उपप्रधान तथा परराष्ट्रमन्त्री नारायणकाजी श्रेष्ठले र जापानको नेतृत्व कामिकावाले गर्नेछिन् । 

द्विपक्षीय बैठकमा नेपाल–जापान सम्बन्धका सबै आयामहरूमा छलफल र समीक्षा गरिनेछ । बैठक जापानी लगानी र सहयोग विस्तार गर्ने विषयमा केन्द्रित हुने जनाइएको छ । 

नेपाल भ्रमणका बेला जापानी विदेशमन्त्री कामिकावाले राष्ट्रपति रामचन्द्र पौडेल र प्रधानमन्त्री पुष्पकमल दाहाल ‘प्रचण्ड’सँग शिष्टाचार भेटवार्ता गर्ने कार्यक्रम छ । 

जापानकी विदेशमन्त्री कामिकावा ६ देशको भ्रमणका लागि वैशाख १४ गते जापानबाट निस्किसकेकी छन् । उनी मादागास्कर, आइभेरी कोस्ट, नाइजेरिया, फ्रान्स, श्रीलंका हुँदै नेपाल आउन लागेकी हुन् । नेपाल आएकै दिन उनको स्वदेश फर्कने कार्यक्रम छ ।