काठमाडौं । ललितपुरको गोदावरीस्थित बडिखेल वनमा डढेलो निभाउने क्रममा मंगलबार तीनजना घाइते भएका छन् । केही दिनेदेखि लागेको डढेलो निभाउने क्रममा तीनजना घाइते भएका गोदावरी नगरपालिकाले जनाएको छ ।

नगर प्रमुख गजेन्द्र महर्जनका अनुसार, उपचारका निम्ति घाइतेलाई राष्ट्रिय ट्रमा सेन्टर र कीर्तिपुर बर्न अस्पतालमा पठाइएको छ ।

गोदावरीकै लेले क्षेत्रको आनन्द वनमा डढेलो लाग्दा आनन्द वन अस्पताल जोखिममा परेको छ । अस्पतालमा उपचाररत करिब ९० बिरामीलाई बज्रवाराही प्राथमिक स्वास्थ्य सेवा केन्द्र र अरू स्वास्थ्य चौकीहरूमा सारिएको प्रमुख महर्जनले बाह्रखरीलाई जानकारी दिए ।

डढेलो नियन्त्रणका निम्ति स्थानीय तह, प्रहरी जुटेका छन् ।