काठमाडौं । अमेरिका र वेस्ट इन्डिजमा हुने आईसीसी ट्वान्टी–२० विश्वकप क्रिकेटका लागि न्युजिल्यान्डको राष्ट्रिय टिमको घोषणा भएको छ । 

न्युजिल्यान्ड क्रिकेट बोर्डले सोमबार केन विलियम्सनको कप्तानीमा १५ सदस्यीय राष्ट्रिय टोलीको घोषणा गरेको हो । विश्वकपका लागि घोषित टिममा औँलाको चोटका कारण मैदानबाट बाहिर रहेका डेविड कोन्वे पनि समेटिएका छन् । 

टिममा कप्तान विलिम्सनसहित मार्क च्यापम्यान, फिन अलन, ट्रेन्ट बोल्ट, मिचेल ब्रिसवेल, डेवन कोन्वे, लकी फर्गुसन, मेट मेन्री, डार्यल मिचेल, जिम्मी निसम, ग्लेन फिलिप्स, रचिन रवीन्द्र, मिचेल सान्तनर, इस सोधी र टिम साउदी छन् ।

प्रतियोगिताको समूह ‘सी’ मा रहेको न्युजिल्यान्डले जुन ८ मा पहिलो खेल अफगानिस्तानसँग खेल्नेछ । यो समूहमा न्युजिल्यान्ड र अफगानिस्तानसँगै पपुवा न्युगिनी (पीएनजी), वेस्ट इन्डिज र युगान्डा छन् ।

ट्वान्टी–२० विश्वकप यसै वर्षको जुन १ देखि सुरू हुने तालिका छ ।