काठमाडौं । सरकारले दिने भनेको स्टार्टअप कर्जाका लागि पहिलो चरणमा ३९४ कम्पनी छनोट  भएका छन् ।

उद्योग, वाणिज्य तथा आपूर्ति मन्त्रालयअन्तर्गतको औ‍‍द्योगिक व्यवसाय विकास प्रतिष्ठानका अनुसार आवेदन दिएका एक हजार ६५८ मध्ये पहिलो चरणमा ३९४ कम्पनी तथा फर्म छानिएका हुन् ।

सरकारले ‘स्टार्टअप उद्यम कर्जा’का लागि गत फागुन १० गतेसम्म परियोजना प्रस्तावको आह्वान गरेको थियो ।

छनोटमा पर्ने दार्चुलादेखि ताप्लेजुङसम्मका कम्पनी तथा फर्म रहेका छन् ।

• स्टार्टअप कर्जा : दोस्रो वर्षदेखि साँवाब्याज तिर्नुपर्ने, नतिरे पासपोर्ट र सम्पत्ति रोक्का हुने

अबको छनोट प्रक्रिया के ?

पहिलो चरणमा छनोट भएका यी कम्पनीहरूलाई प्रतिष्ठानले यसै वैशाख १९ गतेदेखि जेठ ३ गतेसम्म प्रस्तुतीकरणका लागि बोलाएको छ । प्रस्तुतीकरणको मूल्यांकनपछि प्रतिष्ठानले कर्जा उपलब्ध गराउने बैंकलाई कालोसूचीमा परेन/परेको बुझ्न सिफारिस गर्नेछ ।

बैंकले देशभरका आफ्ना शाखाबाट फर्म, उद्योग तथा कम्पनीमै पुगेर मूल्यांकन गर्ने प्रतिष्ठानका सूचना अधिकारी विश्वनाथ घिमिरेले जानकारी दिए ।

यी सबै प्रक्रिया पूरा गरी छनोट भएका कम्पनीले तीन प्रतिशत ब्याजदरमा पाँच लाखदेखि २५ लाख रुपैयाँसम्म कर्जा प्राप्त गर्नेछन् ।

कम्पनीले सरकारलाई दुईदेखि पाँच वर्षभित्र कर्जाको भुक्तानी गर्नुपर्नेछ ।

• स्टार्टअप कर्जा लिनेको भीड, दुई हजार आवेदन पुग्ने आँकलन

सरकारले स्टार्टअप उद्यम कर्जाका निम्ति चालु आर्थिक वर्षमा २५ करोड रुपैयाँ छुट्याएको छ । त्यसको करिब २५ प्रतिशत रकम कर्जा सुरक्षण कोषका लागि छुट्याइने उनले बताए । बाँकी करिब १८ करोड रुपैयाँ स्टार्टअप कर्जाका लागि उपलब्ध गराइने प्रतिष्ठानले जनाएको छ ।

• स्टार्टअप कर्जाका निम्ति साढे १६ सयको आवेदन, कसरी छनोट हुन्छन् कम्पनी ?