काठमाडौं । सरकारले ‘स्टार्टअप उद्यम कर्जा’का लागि परियोजना प्रस्ताव पेस गर्न आह्वान गरेको बिहीबार (फागुन १० गते) अन्तिम दिन हो । प्रतिष्ठानले माघ १९ गते २१ दिनभित्र प्रस्ताव पेस गर्न भन्दै सूचना जारी गरेको थियो । प्रस्ताव पेस गर्ने अन्तिम दिन औद्योगिक व्यवसाय विकास प्रतिष्ठानमा भीड लागेको थियो । 

स्टार्टअप उद्यम कर्जा सञ्चालन कार्यविधि, २०८० अनुसार सरकारले तीन प्रतिशत ब्याजदरमा २५ लाख रुपैयाँसम्म ऋण उपलब्ध गराउने भएको छ । त्यसैका लागि बुधबारसम्म ८०० वटा स्टार्टअप कम्पनीको प्रस्ताव पेस भएको प्रतिष्ठानले जनाएको छ ।

प्रतिष्ठानका सूचना अधिकारी विश्वनाथ घिमिरेले बिहीबार अन्तिम दिनमा समेत गरी दुई हजार आवेदन पुग्ने बताए । “हिजोसम्म ८०० प्रस्ताव आएको छ । बिहीबार अन्तिम दिन हो धेरै आवेदन आएकाले दुई हजारसम्म पुग्नसक्छ” उनले भने ।

बिहीबार भीड धेरै भएका कारण त्यहाँ आएकालाई टोकन बाँडेर अर्काे मितिमा बोलाइएको छ । “आज सबैलाई टोकन उपलब्ध गराउँछौँ र प्रस्तावनाको कागज/फाइल लिन्छौँ । त्यसपछि तोकिएको मितिमा हामी आफैँ बोलाउँछौँ,” घिमिरेले भने ।

उद्योग, वाणिज्य तथा आपूर्ति मन्त्रालय अन्तर्गतको प्रतिष्ठानले यीमध्ये छनौटमा परेका स्टार्टअपहरूलाई ऋण उपलब्ध गराउनेछ । सरकारले स्टार्टअप उद्यम कर्जाको लागि कुल २५ करोड रुपैयाँ छुट्याएको छ ।

यसमध्ये २५ प्रतिशत करिब ६ करोड २५ लाख रुपैयाँ छुट्याएर बाँकी रकम कर्जाका रूपमा उपलब्ध गराउने घिमिरेले बताए । छनौटमा परेका दुई लाख रुपैयाँदेखि १० लाख रुपैयाँ चुक्तापुँजी भएका सात वर्ष ननाघेका कम्पनीले कर्जा पाउने छन् ।