काठमाडौं । इन्डियन प्रिमियर लिग (आईपीएल)अन्तर्गत दुई शतक बनेको खेलमा लखनउ सुपर जायन्ट्सले चेन्नाई सुपर किंग्सविरुद्ध ६ विकेटको जित निकालेको छ । मंगलबार एमए चिदम्बरम रंगशालामा सम्पन्न खेलमा लखनउका मार्कुस स्टोइनिस र चेन्नईका कप्तान ऋतिराज गाइकवाडले शतक बनाएका हुन् ।
मंगलबार चेन्नाईले प्रस्तुत गरेको २११ रनको लक्ष्य लखनउले १९.३ ओभरमा चार विकेट गुमाएर पूरा गर्याे । लखनउको जितमा स्टोइनिसले ६३ बलमा १३ चौका र ६ छक्कासहित १२४ रन बनाए । आईपीएलको इतिहासमा स्टोइनिसको यो पहिलो शतक हो ।
यसबाहेक, निकोलस पुरनले ३४, दीपक हुडाले १७, कप्तान केएल राहुलले १६ र देभदत्त पडिकलले १३ रन जोडे ।
चेन्नाईका मथिसा पथिरानाले दुई विकेट लिए । मुस्ताफिजुर रहमान र दीपक चहरले एक-एक विकेट लिए ।
त्यसअघि टस हारेर ब्याटिङमा आएको चेन्नाईले निर्धारित २० ओभरमा चार विकेट गुमाएर २१० रनको योगफल खडा गरेको थियो ।घरेलु टिमका कप्तान गाइकवाडले ६० बलमा १२ चौका र तीन छक्कासहित १०८ रन बनाएका थिए । शिवम दुवेले ६६ रन थपे । रविन्द्र जडेजाले १६ रन बनाए ।
लखनउका म्याट ह्यारी, मोहसिन खान र यश ठाकुरले समान एक एक विकेट हात पारे ।
जितसंगै आठ खेलबाट १० अंक जोडेको लखनउ तालिकाको चौथो स्थानमा छ । समान खेलबाट आठ अंक जोडेको चेन्नाई तालिकाको पाँचौँ स्थानमा छ ।
