काठमाडौं । क्रान्तिकारी कम्युनिस्ट पार्टी नेपालका अध्यक्ष मोहन वैद्यले नेकपा (एमाले)ले आफूलाई ‘भाइ कांग्रेस’ बनाउनका लागि नेपाल कम्युनिस्ट पार्टी स्थापनाको हीरक जयन्ती मनाएको टिप्पणी गरेका छन् । 

सोमबार १५५औँ लेनिन जयन्तीको सन्दर्भमा पार्टीले आयोजना गरेको साम्राज्यवादी युगमा लेनिनवादको महत्त्व विषयक अन्तर्क्रियामा बोल्दै अध्यक्ष वैद्यले एमाले गतिलो ‘भाइ कांग्रेस’ बन्नका लागि हीरक जयन्ती मनाएको टिप्पणी गरेका हुन् । 

उनले एमालेले हीरक जयन्ती मनाउनुको उद्देश्य २०८४ मा हुने चुनाव जितेर प्रतिक्रियावादी राज्यसत्ता, दलाल नोकरशाही पुँजीवाद र संसदीय व्यवस्थालाई अझ बलियो बनाउनु रहेको उल्लेख गरे । सत्तामा रहेका एमाले, माओवादी केन्द्र, र एकीकृत समाजवादी कम्युनिस्ट पार्टी नभएको बाए । 

कम्युनिस्ट आन्दोलन दुई धारमा बाँडिएको उल्लेख गर्दै उनले सत्तामा भएका कम्युनिस्ट पार्टीहरू दक्षिणपन्थी अवसरवादी धारमा रहेका बताए । सत्तामा रहेका कम्युनिस्ट पार्टी र कांग्रेसका बीचमा कुनै तात्विक र मौलिक भिन्नता नभएको स्पष्ट पारे । सत्ताधारी कम्युनिस्टहरूले नेपालको वामपन्थी जनमतलाई भ्रममा पार्नका लागि मात्रै कम्युनिस्ट नाम राखेको आरोप लगाए । 

"कम्युनिस्ट आन्दोलनको एउटा धारा, दक्षिणपन्थी अवसरवादी, आत्मसर्मपणवादी धार हो । उनीहरूले आफूलाई कम्युनिस्टको नाममा राखेर, कम्युनिस्टको झन्डा चोरेर, माक्र्सवाद, माओवाद, लेनिनवादको नाम जपेर संसदवादको र प्रतिक्रियावादको खेती गरिरहेका छन् । आज सत्तामा कम्युनिस्टहरू छैनन् । तर प्रतिक्रियावादीहरुले सत्तामा कम्युनिस्टहरु छ, सरकारमा कम्युनिस्ट छ, केही पनि गर्न सकेको छैन भनेर बदनाम गरेका छन् । हाम्रो भनाइ के हो भने ती कम्युनिस्ट होइनन् । त्यो धार दक्षिणपन्थी अवसरवाद धार हो । नेपाली कांग्रेस र सत्ताधारी कम्युनिस्टका बीच कुनै तात्विक र मौलिक अन्तर छैन," उनले भने । 

उनले आफूहरू दक्षिणपन्थी अवसरवादको भण्डाफोर गर्दै अघि बढ्ने बताए ।