भैरहवा । तराई क्षेत्रमा लामो समयदेखि वर्षा नहुँदा यहाँको जनजीवन प्रभावित भएको छ । पानीको अभाव र सुक्खा मौसमका कारण रुपन्देहीका विभिन्न स्थानमा आगलागी हुँदा चौपाया, अन्नबाली र घरमा क्षति भएको छ ।

रोहिणी गाउँपालिका–६ बाट शनिबार अपराह्न नौ गाउँमा आगो फैलिएको जिल्ला प्रहरी कार्यालय रुपन्देहीका प्रवक्ता एवं प्रहरी नायब उपरीक्षक मनोहर भट्टले जानकारी दिए ।

गहुँको नलबाट सुरु भएको आगो बतासका कारण फैलँदा विष्णुपुरा, पर्सा, बुची, बरवा, तर्कुलहा, कोटहवा, चम्कीपुर हुँदै प्रिप्रहवामा क्षति भएको छ । आगोले मानवीय क्षति नभए पनि ४० घर जलेका र ३९ बाख्रा मरेका उनले बताए ।

प्रहरी, सशस्त्र प्रहरी बल, नेपाली सेना, देवदह नगरपालिकाको दमकल र स्थानीयको प्रयासले साँझ आगो निभाइएको थियोे ।

गैडहवा गाउँपालिकामा पनि आगलागीबाट लाखौँको क्षति भएको छ । त्यहाँ गोठमा आगलागी हुँदा नौ बाख्रासहित तीन लाख रुपैयाँ बढीको क्षति भएको प्रहरी कार्यालयले जानकारी दिएको छ ।

लुम्बिनी सांस्कृतिक नगरपालिका–९, पिपरामा खेतमा गहुँका ठुटा जलाउने क्रममा लागेको आगोे होटेल पवन प्यालेस परिसरमा पुगेको थियो । यसबाट प्लाइउड, लत्ताकपडा, भाँडावर्तन, खाद्यान्नसहित सात लाख रुपैयाँबराबरको क्षति भएको प्रवक्ता भट्टले बताए । रासस