विराटनगर । कोसी प्रदेशसभामा संकल्प प्रस्तावमाथि छलफल सुरु भएको छ । नेकपा (माओवादी केन्द्र)का सांसद नारायण बुर्जाले संकल्प प्रस्तावको मर्मले नै सरकार अल्पमतमा परिसकेको सन्देश दिएको बताए ।
माओवादीका अर्का सांसद गोम्बु शेर्पाले नेपालको संविधानको १६८ को उपधारा ५ अनुसार मुख्यमन्त्री बनेका केदार कार्कीले इतिहास रचेको भन्दै राजनीतिक उचाई बढेको बताए । भने, “तर, अहिले राजनीतिक परिवर्तनपछि संसद् मुख्यमन्त्रीको पक्षमा देखिएको छैन । त्यसैले सजिलो र भरपर्दो उपाय राजीनामा नै हो ।”
माओवादी सांसद गीता तिम्सिनाले संकल्प प्रस्ताव समय सन्दर्भ मिलाएरै आएको बताइन् । माओवादी सांसद सपना दर्जीले सरकार अल्पमतमा परेको दाबी गरिन् ।
कांग्रेस सांसद खगेनसिंह हाङगामले राजनीति सम्भावनाको खेल हो भन्दै प्रदेशको मार्गदर्शन के हुने भन्ने प्रस्ट हुन जरुरी भएको बताए । उनले भने, “संकल्प प्रस्ताव बेमौसमी फल हो । दुई वर्षसम्म अविश्वासको प्रस्ताव ल्याउन सकिँदैन ।”
रोष्ट्रमको रुप पनि फरक–फरक हुने भन्दै उनले राजनीतिक फेरबदलले प्रदेशमा असर गरेको बताए । कांग्रेस सांसद विनोद राईले मुलुकको विकास, प्रदेशको विकास, प्रदेशको अँध्यारो कसरी हटाउने भन्नेतर्फ केन्द्रित हुनुपर्ने बताए । भने, “संकल्प प्रस्ताव राजीनामा माग्ने विषयमा केन्द्रित हुनु हुँदैन ।”
राईले कम्युनिष्टहरूले सुझबुझ ढंगले काम गर्न नसकेको र माओवादी यताउता गरिरहने प्रवृत्तिबारे टिप्पणी गरे । भने, “उपधारा ५ अनुसार बनेको सरकारले दुई वर्षसम्म अविश्वासको प्रस्ताव ल्याउन सकिँदैन । बरु मन्त्री बन्न चाहनेलाई बनाऔँ ।” उनले मुख्यमन्त्रीलाई सर्वदलीय सरकार बनाउन सुझाव दिए ।
एमालेका लीलावल्लभ अधिकारीले उपधारा ५ अनुसारको सरकारको विकल्प हुन्छ कि हुँदैन भन्दै प्रश्न गर । भने, “अब प्रदेशसभा विघटन हुन्छ की के हुन्छ भन्ने द्विविधा बढेको छ । के यो सरकार अमरत्व प्राय हो ?” उनले प्रदेशसभा विघटन हुन नसक्ने बरु पाँच वर्ष चल्ने बताए ।
