काठमाडौं । सहिद स्मारक ‘सी’ डिभिजन लिगको क्लब आरसी ३२ फुटबल एकेडेमीका मुख्य प्रशिक्षक गणेश खड्काले वाग्मती युवा क्लबबाट अंक खोस्नु ठूलो सफलता भएको बताएका छन् ।

बुधबार सातदोबाटोस्थित एन्फा मुख्यालयमा भएको खेलमा आरसी ३२ ले वाग्मतीविरुद्ध ३–० को जित निकालेको थियो । आरसीलाई जित दिलाउन विवेक सन्तोषीले दुई र बबिन बोहराले एक गोल गरेका थिए । 

खेलपछि प्रशिक्षक खड्काले वाग्मतीबाट अंक खोस्नु ठूलो सफलता भएको बताएका हुन् । “वाग्मतीविरुद्धको जित ठूलो आत्मबल हो । तर, पनि भर्खर दुई खेल हुँदै छ । लिग अझै लामो छ,” प्रशिक्षक खड्काले बाह्रखरीसँग भने, “हामी धैर्य भएर काम गर्नुपर्छ । वाग्मती निकै बलियो प्रतिद्वन्द्वी पायौँ । उनीहरूले लामो समयदेखि प्रशिक्षण गरिरहेका छन् । उनीहरूबाट अंक खोस्नु भनेको ठूलो उपलब्धि हो ।”

उनले वाग्मतीविरुद्ध टिमले योजनाअनुरूप प्रदर्शन पनि गरेको बताए । “हामीले जे योजना बनाएका थियौँ । त्यो सफल भयो । पहिलो हाफमै २–० को अग्रताले दोस्रो हाफ सहज बनायो । वाग्मतीको खेल्ने तरिका अध्ययन गरेर प्रशिक्षणमा बनाएको योजना सफल भयो । खेलाडीहरूले धेरै राम्रो खेले । वाग्मती सी को राम्रो टिम हो । उनीहरूविरुद्ध हाम्रो टिमले उत्कृष्ट प्रदर्शन गर्‍यौँ,” उनले थपे ।

यस्तै, आरसी ३२ का कप्तान रोहन कार्कीले भने टिम उपाधि लक्ष्यमा अघि बढिरहेको बताए ।

“वाग्मती कठिन प्रतिद्वन्द्वी हो । ऊ पनि उपाधिका लागि तयार भएर आएको छ । उनीहरूले लामो समयदेखि तयारी गरिरहेका छन् । त्यसैले हामीले उनीहरूलाई बलियो प्रतिद्वन्द्वीको रूपमा लिएका थियौँ,” कप्तान रोहनले भने, “म आफ्नो टिमलाई उपाधि दाबेदार मान्छु । गएको संस्करणमा पनि हामी एक अंकले बी डिभिजनमा उक्लिनबाट चुकेका हौँ । यसपालि पनि उपाधिका लागि राम्रो तयारी गरिहेका छौँ । योजनाअनुसार भइराखेको पनि छ । सबै एउटा टिम बनेर गरिरहेका छौँ ।”