काठमाडौं । चालु आर्थिक वर्ष २०८०/८१ को पहिलो महिनायता बैंकहरूको ब्याजदर घट्दै गएको छ । बजार चलायमान नहुँदा बैंकहरूले दिने कर्जाको माग पनि कम छ । त्यसका साथै बैंकहरूसँग प्रयाप्त पैसा भएपछि लगानी गर्न सक्ने अवस्थामा छैनन् । पुरानो कर्जा उठाउन नसक्दा अहिले अधिकांश बैंकहरू पुँजीकोष दबाबमा छन् ।

त्यसले पनि बैंकहरूको ब्याजदर सस्तो छ । आगामी वैशाखमा पनि अधिकांश बैंकहरूले ब्याजदर घटाउने संकेत देखाएका छन् ।

अहिले गत वर्षको तुलनामा बैंकहरूले प्रवाह गर्ने कर्जा र संकलन गर्ने निक्षेपको ब्याजदर सस्तो छ । साउनदेखि नै ब्याजदर क्रमशः घट्दै आएको छ ।

नेपाल राष्ट्र बैंकका अनुसार फागुनमा बैंकहरूले प्रवाह गर्ने कर्जाको औसत ब्याजदर १०.७८ प्रतिशत छ । गत वर्षको फागुनमा १३.०३ प्रतिशत थियो ।

अघिल्लो महिना माघमा कर्जाको ब्याजदर ११.०८ प्रतिशत थियो । गत वर्षको माघमा पनि कर्जाको ब्याजदर १३.०३ प्रतिशत नै थियो ।

गत वर्षको तुलनामा ब्याजदर सस्तो भएको भए पनि निजी क्षेत्रमा जाने कर्जामा भने उलेख्य वृद्धि हुन सकेको छैन । चालु आर्थिक वर्षको फागुन मसान्तसम्म करिब दुई खर्ब रुपैयाँ निजी क्षेत्रतर्फ प्रवाह भएको छ । यो गत वर्षको तुलनामा ४.२ प्रतिशतले बढेको हो । 

फागुन मसान्तमा बैंक तथा वित्तीय संस्थाहरूबाट निजी क्षेत्रमा प्रवाहित कर्जामध्ये गैरवित्तीय संस्थागत क्षेत्रतर्फ प्रवाह भएको कर्जाको अंश ६३.२ प्रतिशत छ ।

त्यस्तै, व्यक्तिगत तथा घरपरिवार क्षेत्रतर्फ प्रवाह भएको कर्जाको अंश ३६.८ प्रतिशत छ । अघिल्लो वर्षको सोही अवधिमा यस्तो निजी क्षेत्रतर्फ ६४.६ प्रतिशत र व्यक्तिगत तथा घरपरिवार क्षेत्रतर्फ ३५.४ प्रतिशत थियो ।