काठमाडौं । सुन तस्करी जाँचबुझ आयोगले प्रहरी नायब उपरीक्षक (डीएसपी) रुगम कुँवर र फरार आरोपित जीवन चलाउनेबीचको फोन सम्पर्कको रिपोर्ट गलत उल्लेख गरेको खुलेको छ ।

सो आयोगले डीएसपी कुँवर र चलाउनेबीच ०७९ पुस १६ देखि ०८० भदौ २५ गतेसम्म दुई हजार ४१० पटक फोन सम्पर्क भएको उल्लेख गरेको छ । तर, कुँवरले सुन्धारास्थित नेपाल टेलिकमको कार्यालयमा निवेदन दिएर आइतबार (हिजो) निकालेको ‘कल डिटेल’मा उक्त अवधिमा उनीहरूबीच ८२ पटक मात्र फोन सम्पर्क भएको देखिएको छ । डीएसपी कुँवर र चलाउने दुवै अछामका बासिन्दा हुन् ।

डीएसपी कुँवरले अछामकै चिनेको मानिस भएकाले चलाउनेसँग फोन सम्पर्क हुने गरेको स्वीकार गर्दै आएका छन् । तर, चलाउनेले गरेको सुन तस्करीबारे आफूलाई कुनै जानकारी नभएको उनको भनाइ छ ।

सुन तस्करी जाँचबुझ आयोगले भने चलाउनेसँग फोन सम्पर्क देखिएको भन्दै उनलाई विभागीय कारबाही सिफारिस गरेको थियो । आयोगको सिफारिसपछि उनलाई केन्द्रीय अनुसन्धान ब्युरो (सीआईबी)बाट प्रहरी प्रधान कार्यालयमा तानिएको छ । उनीबाहेक चलाउनेसँग अरू प्रहरी अधिकारीको पनि फोन सम्पर्क देखिएको छ । तर, कुँवरलाई मात्र कारबाही सिफारिस गरिएको थियो ।

सुन तस्करी प्रकरणको अनुसन्धानमा उनी संलग्न थिएनन् । सो प्रकरणको अनुसन्धानमा खटिएका प्रहरी अधिकारीको समेत कमजोरी देखिएपछि एसपी सञ्जय थापा, डीएसपी दुर्गा दाहाल र सीआईबीकी तत्कालीन प्रमुख एवं एआईजी किरण बज्राचार्यलाई समेत कारबाही सिफारिस गरिएको थियो । उनीहरू सबैजनालाई सीआईबीबाट हटाइएको छ ।

गएको साउनमा भएको ६० किलो सुन तस्करी प्रकरणमा सरकारले असोजमा पूर्वन्यायाधीश डिल्लीराम आचार्यको नेतृत्वमा आयोग गठन गरेको थियो । आयोगले चैत १ गते सरकारलाई प्रतिवेदन बुझाएको थियो ।