नापहरूको कुनै नाप हुँदैन

साहित्य

शनिबार, चैत २४, २०८०

जो कसैको आफन्त होइन
त्यही सबैको आफन्त हो
जसको पुग्ने कुनै ठाउँ छैन
त्यही सबैको गन्तव्य हो
जिउने सबैको उमेर हुन्छ
उमेर हुने अमर हुँदैन
के ठेगाना बताइरहनु
ठेगानको आफ्नो ठेकान हुँदैन

यही चेतनाले मेरो, मलाई बिर्साउँछ
फुल्दाको रोमाञ्चलाई ओइलिने पीरले पिरोल्छ
जति उडे पनि के भो, जति बगे पनि के भो
नापहरूको कुनै नाप हुँदैन

तिमीसम्म पुग्ने कुरा
हाम्रो दूरीको नाप मात्रै हो
तिमीलाई भेट्टाउने कुरा
तिमी हराउँदाको अनुभूति मात्रै हो
जोडिएका नाताहरू टुटफुटका संघारहरू हुन्
सार्वभौम स्वभाव नभए पुगिने सबै अनित्य हुन्

बदल्न जो मिल्दैन, त्यही तिमी हौ
टिकाइरहन जो पर्दैन, त्यही तिमी हौ
जे हुन नसकेको हो, त्यही तिमी हौ
जे हुन नपरेको हो, त्यही तिमी हौ ।