काठमाडौं । नेपाल वायुसेवा निगमका कार्यकारी अध्यक्ष युवराज अधिकारीले नियामक निकाय नेपाल नागरिक उड्डयन प्राधिकरणसमक्ष स्पष्टीकरण बुझाएका छन् ।

प्राधिकरणले गत चैत १३ गते २७ बुँदामा सातदिने स्पष्टीकरण सोधेको थियो । निगमका कार्यकारी अध्यक्ष अधिकारीले हिजो (सोमबार) स्पष्टीकरणसहितको पत्र बुझाएको प्राधिकरणका सहप्रवक्ता ज्ञानेन्द्र भुलले जानकारी दिए । 

निगमका कार्यकारी अध्यक्षले पठाएको पत्रको अध्ययन गरेर थप निर्णय गर्ने सहप्रवक्ता भुलले बताए । “हिजो (सोमबार) स्पष्टीकरण पत्र आएको छ । चित्तबुझ्दो जवाफ छ/छैन हामी अध्ययन गरेर अघि बढ्छौँ,” भुलले भने ।निगमले हवाई सुरक्षामा गम्भीर लापरबाही गरेको भन्दै कार्यकारी अध्यक्ष अधिकारीलाई २७ बुँदे स्पष्टीकरण सोधेको थियो ।

निगमको कन्टिन्युइन एयरओर्थिनेस म्यानेजमेन्ट अर्गनाइजेसन डिपार्टमेन्ट ६ महिनादेखि नेतृत्वविहीन बनेको छ । सुरक्षासँग प्रत्यक्ष सरोकार राख्ने विभाग नै नेतृत्वविहीन हुँदा उडान सुरक्षामा असर पर्ने प्राधिकरणको निष्कर्ष छ ।चार महिनाअघि युरोपियन युनियन (ईयू)ले देखाएको कमीकमजोरीमा पनि उल्लेखनीय सुधार नगरेको भेटिएको छ । निगमले आफ्नो जहाज मर्मत सम्भारमा पनि लापरबाही गर्दै आएको प्राधिकरणले जनाएको छ ।

निगमको एयरबस ३२० कलसाइन नाइन एन–एकेएक्स इन्जिन स्पेयरका कारण ग्राउन्डेड भएको थियो । जहाज मर्मतका लागि भन्दै इजरायल एयरोस्पेसमा लगिएको थियो । तर, जहाज हालसम्म पनि मर्मत हुन सकेको छैन ।

इन्जिन प्राप्तिको उचित योजनाबिना विमान इजरायलमा राखिएको थियो । यसले निगमलाई थप आर्थिक भार पर्न सक्ने प्राधिकरणले जनाएको छ । प्राधिकरणले पाँच वर्षअघि नै मर्मत सम्भारको लागि स्वीकृति दिएको थियो । तर, अहिलेसम्म पनि प्रगति हुन सकेको छैन ।