काठमाडौं । प्रमुख प्रतिपक्ष दल नेपाली कांग्रेसको कार्यसम्पादन समितिको बैठक बोलाइएको छ । यही चैत २० गतेका निम्ति बैठक आह्वान गरिएको पार्टीका मुख्यसचिव कृष्णप्रसाद पौडेलले जानकारी दिए ।

बैठक बूढानीलकण्ठस्थित सभापति शेरबहादुर देउवाको निवासमा सो दिन दिउँसो २ बजे बस्नेछ । इलाम क्षेत्र नम्बर–२ मा हुने प्रतिनिधिसभा सदस्य उपनिर्वाचनका विषयमा छलफल र उमेदवारको टुंगो लगाउन बैठक बोलाइएको हो ।

निर्वाचन आयोगले चैत २४ गते उमेदवारको मनोनयनपत्र दर्ताको समय तोकेको छ । कांग्रेसको सो बैठकबाट उमेदवारको टुंगो लगाउने तयारी छ ।

यस्तै, प्रदेशसभातर्फ बझाङ–१ ‘क’मा हुने उपनिर्वाचनका विषयमा पनि छलफल र उमेदवार टुंगो लगाउने कांग्रेसको तयारी छ ।

आउँदो वैशाख १५ गते इलाम र बझाङका ती क्षेत्रमा उपनिर्वाचन हुँदै छ ।